CBCS ta kompartí resultadonan di e Central Bank Transparency Code Review di IMF i ta keda komprometí pa sigui mehorá 

CBCS ta kompartí resultadonan di e Central Bank Transparency Code Review di IMF i ta keda komprometí pa sigui mehorá 

WILLEMSTAD/PHILIPSBURG —Centrale Bank van Curaçao en Sint Maarten (CBCS) awe ta  kompartí e resultadonan di e Central Bank Transparency (CBT) Code Review di Fondo  Monetario Internashonal (IMF). CBT Review ta un análisis pa determiná kuantu transparensia i  klaridat tin den e manera ku CBCS ta komuniká i funshoná den ehekushon di su tareanan  prinsipal, entre otro riba tereno di ‘governance’, desaroyo di maneho i su operashonnan diario,  kon e ta raportá tokante su propio prestashonnan, i kon e ta traha huntu ku gobièrnu i demas  stakeholdernan. CBCS ta balorá e rekomendashonnan risibí i lo usa nan pa sigui elevá su nivel  di transparensia i e manera ku e ta komuniká i duna informashon.  

CBCS a pidi e evaluashon di transparensia aña pasá. Esaki ta evidensia di su kompromiso di semper  pa traha riba mas transparensia, sentido di responsabilidat i konfiansa di públiko. E evaluashon  tabata un oportunidat balioso pa CBCS reflekshoná riba e manera ku e ta funshoná komo  institushon. Un tim multidisiplinario di diferente divishon di CBCS a partisipá den e proseso akí i,  danki na esei, por a hasi un evaluashon amplio di e manera ku Banko ta atendé ku transparensia i  duna informashon na públiko. Tambe, IMF a tene un enkuesta digital i a hiba kòmbersashon  personal tantu na Kòrsou komo na Sint Maarten, pa asina komplementá e evaluashon ku aporte di  su stakeholdernan prinsipal. Tur esaki a yuda identifiká algun área pa mehorashon i punto spesífiko  ku por traha ariba pa sigui hisa e nivel di transparensia i responsabilidat. Manera IMF a remarká,  transparensia ta un pilá di apoyo esensial pa un banko sentral por funshoná na un manera efektivo  i salvaguardá su kredibilidat. 

CBCS ta apresiá ku IMF ta rekonosé e adelantonan importante ku tabatin den e último añanan riba  tereno di transparensia, komunikashon i kolaborashon ku stakeholder. Den su evaluashon, IMF a  resaltá e adelantonan supstansial riba tereno di CBCS su komunikashon, entre otro: publikashon  mas frekuente, komunikashon na vários idioma, mas uso di kanal digital i informe mas kla tokante  CBCS su tareanan prinsipal. E stakeholdernan ku IMF a enkuestá tambe a rekonosé ku tin un  adelanto notabel. CBCS a skor bon serka nan pa su nivel general di transparensia i aksesibilidat di  informashon.

Ademas, IMF a elogiá CBCS pa e nivel haltu di transparensia den su maneho monetario. Banko ta  komuniká klaramente kiko ta su ophetivonan, ki instrumento e ta usa i pa ki motibunan nos moneda ta mará na dòler. Den e evaluashon, tin palabra di elogio tambe pa e análisisnan amplio  ku CBCS ta publiká, manera su Informe di Stabilidat Finansiero, e aserkamentu bon definí ku e ta  usa pa maneho di reserva, i e manera konsistente ku e ta komuniká riba maneho di supervishon,  medida pa protekshon di konsumidó i e normanan di AML/CFT. 

CBCS a evaluá tur e rekomendashonnan i ya kaba a identifiká akshon konkreto pa sigui oumentá  su nivel di transparensia. Tur e puntonan di akshon fihá a base di e evaluashon CBT a keda integrá  den e Plan Stratégiko 2026–2028 di CBCS, garantisando asina un kompromiso firme pa e  próksimo añanan. 

‘Nos ta konvensí ku transparensia ta esensial pa mantené konfiansa di públiko, i pa nan por sigui  pidi nos kuenta i rason. E ehersisio akí ta un refleho di esei.’ Asina Richard Doornbosch, Presidente  di CBCS, a deklará. ‘Nos ta balorá e guia konstruktivo ku nos a risibí di IMF i lo sigui edifiká riba e  adelantonan lográ te asina leu.’ 

CBCS ta gradisí e Mission Team di IMF pa e splikashonnan profeshonal i asertá ku nan a duna  durante e mishon. Tambe, Hunta di Maneho ta ekspresá su profundo apresio na personal di CBCS  pa nan apoyo i dedikashon durante henter e proseso di evaluashon, i na nos stakeholdernan  eksterno pa nan aportenan konstruktivo i boluntat pa kolaborá. 

E informe kompleto, Central Bank Transparency Code Review Report, ta disponibel riba nos  wèpsait: https://www.centralbank.cw/about-the-bank/governance-risk-and-compliance 

Willemstad, 30 di mart 2026 

CENTRALE BANK VAN CURAÇAO EN SINT MAARTEN