Piskadónan a instalá un “AIS port receiver” na Banda Bou

Piskadónan a instalá un “AIS port receiver” na Banda Bou

Willemstad – Resientemente piskadónan a instalá un asina yamá “AIS port receiver” na Wèstpunt. Ya ta konosí ku Ministerio di GMN durante e aña ku a pasa a instalá un gran kantidat di “Fish Aggerating Devices” (FAD’s) kual ta e buinan pa atraé piská den awanan di Kòrsou.

Pa yuda garantisá seguridat di nabegashon i evitá dalmentu di barkunan den e FAD’s, tur FAD ta ekipá ku un lus ku ta sende anochi, e “radar reflectors” i AIS.

AIS (Automatic Identification System) ta un sistema di lokalisashon (tracking system) ku barkunan sa uza pa transmití i risibí informashon relashoná ku barkunan den bisindario. E ta funshoná manera un “marine GPS sharing system”, kaminda kada barku ta manda su posishon i detayes i otro barkunan i stashonnan na kosta por risibí e señalnan aki. AIS ta kompartí nòmber di barku i number di identifikashon di pais, posishon, velosidat, direkshon i tipo di barku.
Komo Kòrsou su “AIS port receivers” tabata konsentrá na Banda Ariba, e FAD’s nan di Banda Bou no tabata visibel riba e aplikashonnan digital kaminda por monitòr e tráfiko marino rondó di Kòrsou (entre otro Find Ship i Marine Traffic).

Awor ku e “port receivers” ta instalá na Westpunt, tur FAD na Banda Abou ta visibel i konsekuentemente nos piskadónan por lokalisá e FAD’s nan muchu mas fásil.

Ministerio di GMN ta aploudí e inisiativa di e piskadónan ku a kontribuí na halsa e seguridat marino, hasi’é muchu mas fásil pa tur piskadó por lokalisá e FAD’s nan i hasi’é posibel pa outoridatnan por monitòr tráfiko marino i e FAD’s na Banda Bou.

Ilustrashon 1. E “port station” na Wèstpunt ku resienmente a keda instalá.

Ilustrashon 2. E FAD’s na Banda Bou (Punt’i Angua, Watamula Piedra Pretu, Punta
Abou, Kòrta Pe, Lagun, Sta. Cruz i Kaap St. Marie).