Transishon pa florin karibense finalisá ku éksito 

NAf por wòrdu kambiá solamente na CBCS 

Willemstad/Philipsburg – Un aña despues di introdukshon di florin karibense, Centrale Bank  van Curaçao en Sint Maarten (CBCS) ta mira bèk riba un transishon pa e moneda nobo  eksitoso. Entrante 1 di aprel 2026, por kambia biyete i moneda di florin antiano (NAf) solamente  na CBCS. Kambio na bankonan komersial no ta posibel mas for di e fecha akí. Públiko por  kambia NAf na CBCS te ku 31 di mart 2055.  

Dia 31 di mart 2025 a introdusí e florin karibense ofisialmente den e union monetario di Kòrsou i  Sint Maarten. Desde e dia ei, siudadano- i negoshinan gradualmente a pasa di NAf pa e moneda  nobo. Te ku fin di febrüari 2026, un total di mas o ménos 385.9 mion (aproksimadamente 77%) di  e biyete- i monedanan NAf ku tabata den sirkulashon na 31 di mart 2025 a wòrdu kambiá. 

CBCS ta ekspresá su apresio pa tur instansia i persona ku a kontribuí na un proseso di transishon  efisiente. Un danki speshal ta bai pa e bankonan komersial ku a hunga un ròl krusial den e proseso  di kambio. 

Personanan ku ta bishitá CBCS na Kòrsou pa promé biaha i ke kambiá un suma bou di Cg 20.000  por hasi esaki sin sita di djabièrnè te ku djaluna entre 8.00 i 12.00 di mèrdia. Tur otro kliente nos ta  pidi pa por fabor traha un sita promé via http://www.centralbank.cw/exchange-request. 

Transakshon di kambio na CBCS na Sint Maarten ta solamente posibel ku un sita via di e-mail:  cashdepartment-sxm@centralbank.sx. 

Pa por kambia mas ku 20.000 florin, tin kondishonnan adishonal. CBCS su prosedimentunan di  kambio ta duna informashon detayá riba esaki i ta disponibel riba nos wèpsait:  https://www.caribbean-guilder.com/exchange-procedure. 

Willemstad, 31 di mart 2026 

CENTRALE BANK VAN CURACAO EN SINT MAARTEN