Consulta Nacional cu sector musical na Aruba ta inicia proceso pa crea Inventario di Patrimonio Cultural Intangibel
Consulta Nacional cu sector musical na Aruba ta inicia proceso pa crea Inventario di Patrimonio Cultural Intangibel
ORANJESTAD, 7 di april 2026 – Comision Nacional Patrimonio Cultural Intangibel Aruba (PCI) ta invita tur miembro di e sector musical na Aruba pa participa den e prome Consulta Nacional cu lo enfoca riba e tema: “Ban Combersa di Musica na Aruba”.
E consulta aki ta forma parti di un proceso nacional mas amplio pa desaroya Aruba su Inventario Oficial di Patrimonio Cultural Intangibel (PCI), manera stipula den e tratado di UNESCO di 2003 pa salvaguardia di patrimonio cultural intangibel, cu Aruba a co-ratifica na 2013. PCI tin e responsabilidad pa guia y coordina un proceso participativo cu comunidad pa documenta y reconoci practicanan cultural cu ta biba den nos sociedad.
Reconociendo e rol central di musica den identidad cultural di Aruba, e comision a scoge musica como tema di enfoke pa e prome consulta nacional. E sesion aki tin como meta pa crea un espacio habri pa dialogo constructivo, intercambio di idea y reflexion riba presente y futuro di musica na nos isla, cu enfoke riba su balor cultural, desaroyo y preservacion.
Mas importante ainda, e consulta lo contribui directamente na creacion di un inventario nacional, pa identifica y documenta e diferente expresionnan musical cu ta forma parti di nos patrimonio cultural intangibel. Pa logra esaki, participacion activo di e sector ta esencial.
Meta principal di e consulta:
- Stimula comunidad pa participa den combersacion habri riba tradicion musical cu ta practica, balora y transmiti na Aruba
- Identifica elementonan di patrimonio musical cu por forma parti di e inventario nacional di PCI
- Haya bista riba transmision, estado actual y necesidadnan di salvaguardia
- Fomenta inclusion den e proceso nacional di documentacion cultural
- Trece concientisacion riba e tratado di UNESCO di 2003 y Aruba su obligacionnan internacional
Resultado spera di e consulta:
- Un lista preliminar di elementonan di patrimonio musical Arubiano pa sigui documenta
- Identificacion di practicantenan, portadonan di tradicion y stakeholdernan relevante
- Bista riba necesidadnan di salvaguardia y posible area di vulnerabilidad
- Mayor conscientisacion publico tocante patrimonio cultural intangibel
- Un base pa siguiente consultanan riba otro area cultural, manera tradicion oral, festividad, oficio y conocemento tradicional
PCI ta motiva musico, compositor, productor, educador musical y otro actor relevante den sector musical pa participa activamente y comparti nan experiencia, punto di bista y vision.
Detaye di e evento:
Fecha: Diasabra, 11 di april 2026
Ora: 2:00 pm – 4:30 pm
Luga: MFR 1, JFK Education Center
Adres: Stadionweg 37, Oranjestad
Participacion di e gremio musical, hoben y comunidad en general ta esencial pa construi un base solido pa futuro di musica na Aruba y pa sigura cu e inventario nacional ta refleha e realidad bibo di nos cultura.
Registra pa medio di e siguiente link:
https://form.jotform.com/260854139232052 of yama Departamento di Cultura Aruba na 582-2185.
Pa mas informacion, por tuma contacto cu Comision Nacional Patrimonio Cultural Intangibel Aruba via email: patrimonioaruba@outlook.com of e Facebook Page: Patrimonio Cultural Intangibel di Aruba y Instagram: pci.aruba
Hunto nos ta conserva y fortalece nos identidad cultural!
