Meteorological Department Curacao Jandino Asporaat ta bishitá Meteo

Servisio Meteorológiko Kòrsou a risibi bishita awe di sr. Jandino Asporaat. Durante e bishita di kortesia, Meteo a duna sr. Jandino splikashon di tur e tarea- i responsabilidatnan di Servisio Meteorológiko Kòrsou.

Mas aleu direktor di Servisio Meteorológiko Kòrsou, sr. Albert Martis a splika mas tokante e topiko di Kambio di Klima i e posibel impaktonan pa nos pais.

Por ehèmpel:
• Oumento di nivel di laman
• Kalor Ekstremo
• Sekura
• Mal Tempu

Kambio di Klima no tin solamente impakto riba hende i naturalesa, pero tambe riba e sektor ekonomiko di un Pais. Sektor di peska i agrikultura ta dependé hopi di un klima stabíl.

Tambe, e ta importante pa salú di hende. Klima mas kayente por afektá salú di hende, manera deshidratashon òf enfermedatnan ku ta propagá mas lihé.

Mas aleu kambionan klimatológiko ku impaktonan riba sekura i mal tempu, por kousa peliger pa bida di hende.

Finalmente, kambio di klima ta importante pasobra e ta afektá futuro di un pais. Si no tuma medidanan awor, e problema por bira mas grandi i mas difísil pa resolvé despues.

Pa e motibu aki Servisio Meteorlógiko Kòrsou lo sigui inverti den estudionan riba e tereno di kambio di Klima pa asina sigui prepara nos komunidat pa futuro i brinda koperason na sektor priva.

Finalmente sr.Albert Martis a hasi entregá di un raport klimatológiko traha dor di Meteo na sr. Jandino Asporaat.

Riba e imagen por tuma nota di Direktor di Meteo sr. Albert Martis i sr. Jandino Asporaat propietario di Hòfi Mango.