Medidanan na JJIC: fortalesimentu di e enfoke pedagógiko i perspektiva di futuro pa hubentut sentral

Willemstad – Minister di Hustisia a tuma medidanan ku prioridat na Justitiële Jeugdinrichting Curaçao (JJIC) despues di señalnan i desaroyonan kresiente den e institushon.

E situashon ku a surgi ta mustra ku na JJIC mester no solamente restablesé pas i stabilidat, sino spesialmente fortalesé e tarea prinsipal di e institushon, e re-edukashon i desaroyo di hóbennan.

JJIC ta un institushon di residensia pa hóbennan ku ta enfoká riba hóbennan ku a ser pone bou di medidanan sivil òf penal. E institushon ta kumpli un ròl krusial den e kadena di protekshon di hubentut, kaminda no solamente tin alohamentu, sino prinsipalmente guia, tratamentu i preparashon pa un integrashon eksitoso den sosiedat.

Mishon di JJIC ta enfoká riba re-edukashon di hóbennan dor di stimulá komportamentu sosialmente aseptabel, desaroyá talento i inkompetensianan, i promové kresementu kognitivo dor di edukashon adaptá. Ademas, unda ta nesesario, ta ofresé yudansa spesialisá, ta traha riba fortalesé relashon entre mayornan i yu, i ta realisá investigashon siko-diagnóstiko i intervenshonnan sikológiko dirigí.

Den e enfoke aki ta traha ku un modelo holístiko, kaminda tin atenshon pa bienestar físiko, sosial, mental, material i kultural di e hóben. Pa kada hóben ta formulá un plan individual di guia, adaptá na e problemátika spesífiko i nesesidatnan di desaroyo. Métodonan manera e modelo sosiológiko – ku ta inkluí un kultura di normanan positivo i guia den grupo i ta forma un base importante.

Den e konteksto aki, despues di bon konsulta ku e direktora, a disidí pa hasi un kambio den direkshon. Pa e motibu aki, e ta pone fin na su trabou ku efekto inmediato. E paso aki a ser tuma ku e meta di restablesé konfiansa, stabilidat i un guia mas fuerte. Miéntras tantu, lo nombra un direktor interino.

Ademas, ta implementá un pakete di medidanan inmediato, inkluyendo:

• Mantenshon nesesario di e fasilidatnan;
• Fortalesimentu di e kapasidat di personal, kaminda lo pidi asistensia di un institushon eksterno pa disponé di mas guia di grupo na término kòrtiku;
• Uso di apoyo sikososial adishonal, kaminda PSI Skuchami ta pone sikólogonan disponibel pa asistensia adishonal;
• Ehekushon di un investigashon independiente riba e supuesto mal-práktikanan;
• Disponé di lèptòpnan ku uso di internèt limitá i/òf kontrolá; i
• Realisashon di un limpiesa grandi di e tereno di e institushon.

Ademas, anteriormente ya a tuma paso nan despues di señalnan i bishitanan anterior. Asina, a habri i yena vakaturanan pa fortalesé e kapasidat di personal. Tambe, na 2023 a formulá e plan di kresementu “Krese!”, un programa integral di mehorashon enfoká riba profeshonalisashon di e organisashon, fortalesimentu di e struktura di kuido i guia, i mehora di e kalidat pedagógiko den e institushon.

E implementashon di e plan aki lo ser aselerá, kaminda Stichting Overheidsaccountantsbureau (SOAB) ta involukrá kaba den e elaborashon i sosten.

Tambe, a atraé ekspertonan eksterno pa logra un programa balansá di aktividat diario pa e hóbennan, kaminda struktura, desaroyo i guia ta sentral. Simultáneamente ta traha riba mehorashon struktural pa término mediano, inkluyendo invershonnan adishonal den infrastruktura, manera konstrukshon di un espasio multifunshonal, operashon di e fasilidatnan di kushina i mas profeshonalisashon di e organisashon.

Minister Hato ta enfatisá ku e esfuersonan di e ministerio ta dirigí riba hasi JJIC funshoná komo un institushon moderno, fuerte den su enfoke pedagógiko i orientá na futuro.
“Nos ta papia aki di hóbennan ku tin derecho na guia, oportunidat i perspektiva. Nos empeño ta pa ofresé nan e sosten korekto, pa nan por desaroyá nan mes komo partisipantenan kompleto den sosiedat.”

E minister lo sigui monitoreá e progreso di e medidanan di serka i, si ta nesesario, tuma paso adishonal.

[FIN DI KOMUNIKADO]