Konseho di Minister ta risibí Sekretario di Estado pa Relashonnan den Reino i Gobièrnu Efektivo
Asuntunan General i Promé Minister
Konseho di Minister ta risibí Sekretario di Estado pa Relashonnan den Reino i Gobièrnu Efektivo
Publiká riba 16 Aprel 2026
WILLEMSTAD – Riba djárason 15 di aprel 2026, Konseho di Minister a risibí un bishita di trabou di Sekretario di Estado pa Relashonnan den Reino i Gobièrnu Efektivo, sr. Eric van der Burg, i su delegashon.
Durante e reunion a enfoká riba kontinuashon di e paketenan di pais i un kolaborashon mas amplio den Reino. A pone atenshon na e fase final di e paketenan di pais, kaminda e énfasis ta pa kambia di planifikashon pa implementashon i sigurá resultadonan. Kòrsou a indiká ku den e fase akí ta importante pa hasi eskohonan kla, konsiderando e kapasidat di implementashon disponibel den gobièrnu. Tambe a enfatisá e importansia di sigui kolaborá a base di igualdat i responsabilidat nashonal, dirigí riba fortalesé resiliensia di e kapasidat gubernamental i ekonómiko.
Ademas, a papia tokante e desaroyonan geopolítiko internashonal, su efekto riba preisnan i kon esaki ta afektá komunidat. Den e kuadro ei, a trata e nesesidat di invertí strukturalmente den seguridat di kuminda i e sektor agrario, i tambe oportunidatnan pa solushonnan inovativo manera hidropónika pa fortifiká e posishon stratégiko di pais pa alimentá su mes.
Tambe a para ketu na e desaroyonan ekonómiko. A señalá kresementu den turismo komo un impulso positivo pa ekonomia. Na mes momento a suprayá ku kresementu ekonómiko mester bai konhuntamente ku fortifikashon di e base sosial i bon funshonamentu di servisionan públiko.
Mas aleu a papia tokante e fondonan disponibel den Reino, inkluso e rekursonan pa proyektonan dirigí riba, entre otro, suministro di kuminda i desaroyo sosial. Tambe a konfirmá ku lo kontinuá e inisiativa i fondonan pa loke ta trata historia di sklabitut, ku atenshon pa uso efisiente i responsabel di esaki.
E delegashon Hulandes ta konsistí di representantenan di Ministerio di Asuntunan Interno i Relashonnan den Reino, entre otro sra. Barbara Wolfsberger (Director-general pa Relashonnan den Reino), sr. René Bagchus (Direktor pa Relashonnan den Reino), i sra. Sophie Ter Vrugt (konsehero). Na nòmber di Representashon di Hulanda na Willemstad a tuma parti sr. Gerbert Kunst i sr. Stefan Riezebos.
E bishita di trabou ta parti di un seri mas amplio di enkuentronan den region. Despues di Kòrsou, e delegashon lo sigui su programa na Boneiru.
