Ceremonia di krans na Santana di Zeewijk ta honra memoria di Jacobo “Coco” Winterdal

Minister President Mike Eman ta conmemora: Ceremonia di krans legging na Santana di Zeewijk pa honra memoria di Jacobo “Coco” Winterdal

Diaranson anochi a tuma luga un ceremonia conmemorativo na Santana di Zeewijk, unda Prome Minister Mike Eman a pone un krans na memoria di señor Jacobo Winterdal, mihor conoci como “Coco”, pa honra su fecha natalicio.

E acto a reuni famia y amigonan, kende lo a yega hunto pa recorda su bida y su contribucion na comunidad. Durante su bida, Jacobo Winterdal a destaca como un trahador dedica y un persona cu fuerte sentido di compromiso, cu a cuminsa su carera na Telefon Dienst (awor SETAR N.V.) na un edad hoben y despues a sirbi pa decada cu dedicacion y integridad.

Den añanan hopi dificil pa AVP, Jacobo Winterdal tabata presente firmemente como candidato di partido. Na 1975, el a participa hunto cu Rudy Frank, y na 1977 hunto cu Henny Eman, demostrando su compromiso continuo cu e movimiento politico.

Despues di su retiro, el a dedica su tempo na su famia y na actividadnan personal, reflehando balornan di union familiar y simplicidad.

Minister President Mike Eman a indica cu e ceremonia di awe ta representa un momento di reflexion y aprecio, unda participantenan lo recorda no solamente su legado personal, sino tambe e balornan cu el a representa durante su bida.

Premier Eman ta reconoce importancia di mantene memoria di ciudadano cu a contribui na desaroyo di sociedad, reconociendo cu e historia personal di cada individuo a forma parti di e historia colectivo di nos pais.