Dokumental  ‘Si e Baranca por a Papia’ ta yega Korsou despues di exito na Aruba

Dokumental  ‘Si e Baranca por a Papia’ ta yega Korsou despues di exito na Aruba

Dokumental Si e Baranca por a Papia: Storianan di Sclavitud lo ta pasa na The Movies Curaçao (Punda i Otrobanda) di 23 te ku 29 di aprel 2026. Despues di un periodo di kuater siman di screening na Aruba, na unda ku mas di 1300 persona a mira e dokumental den e salanan di The Movies Aruba, e film awor ta sigui su trayecto pa Korsou.

Produci pa periodista Melissa Stamper den kolaborashon cu The POV Productions, e dokumental ta investiga historia di sclavitud na Aruba door di konekta archivo, mapa historiko i lugarnan real riba e isla.

Al kontrario cu Korsou, e lugarnan na Aruba no ta visibel mas. E film ta pone enfoke riba lugarnan ku na Aruba ta konosí mane kunuku, tereno of concessie grond, pero ku tin un pasado mas profundo liga ku trabou forsa i sistema di plantage.

E film ta sigui historia di personahenan manera Virginia, Thomas, Flip i e mucha Juan, cu nan bida a wordo registra den archivo, pero ku awor nan storia ta bira visibel riba pantaya.

Mas ku solamente un historia di Aruba, e dokumental ta mustra kon e pasado aki ta resona mas amplio den Caribe, i kon nos ta conecta ku otro dentro di region.

Di Aruba pa Korsou

E dokumental a bai den premiere na Aruba dia 5 di maart 2026 i a pasa te ku 1 di aprel, ku screening den The Movies Gloria, Renaissance i Principal. E reakshonnan di publiko tabata positivo i a habri luga pa konversashon riba e manera ku historia di sklabitut ta wordo mira i papia riba e isla.

Ku e screening na Korsou, e proyecto ta sigui komparti e investigashon ku un audiencia mas amplio den region.