Santa Cruz, ARUBA: Recientemente, seis oficial di Cuerpo Policial Aruba (KPA) y un colega di Kustwacht a completa e curso specialisa di TOL-C (Tactisch Operationeel Leiderschap Cariben) cu exito.

Cu e logro aki, KPA ta sigui duna contenido na su meta di eleva e nivel operacional y di liderazgo den e maneho di situacionnan tactico.

E coleganan di KPA cu a finalisa e trayecto aki ta: L.A. Gumbs, S.G. Meye, J.P. Orman, M.A. Solognier, N. Tromp y M.Z.M. Tuitt. Tambe a gradua e colega di Kustwacht, R. Boezem.

E curso di TOL-C ta conoci pa su exigencianan halto, caminda ta enfoca riba e capacidad di e polis pa tuma decisionnan critico bou di presion. E training ta prepara e polisnan pa coordina y garantisa seguridad di tanto e coleganan como e comunidad durante incidentenan di riesgo halto.

E estudio di liderazgo aki tabata bou di direccion di docentenan di Academia Policial Hulandes, Marloes Raeke y Aniek Prins.

E cooperacion aki entre diferente cuerpo den region ta duna oportunidad pa desaroyo nobo y ta fungi como un plataforma pa hisa e nivel profesional den e cuerponan policial.

E meta principal di Cuerpo Policial Aruba ta pa sigui inverti den su agentenan pa nan por desaroya nan habilidad y conocemento na bienestar di e organisacion. Formando lidernan hoben cu un vision fresco, KPA ta prepara e generacion nobo cu lo mester hiba e cuerpo padilanti.

Altocomisario di Polis, Sr. Ramon Arnhem, a expresa su orguyo bisando: “E exito di nos coleganan den e curso di TOL-C ta un prueba di nan dedicacion y e esfuerso pa keda progresa y pa crea lidernan pa futuro.”

Cuerpo Policial Aruba ta felicita tur e coleganan cu a demostra perseverancia y disciplina durante e curso aki. Un danki special ta bay na e docentenan y tur esnan cu a facilita e proceso di capacitacion aki.

KPA ta keda comprometi pa sigui inverti den su personal, cu e unico meta di brinda un servicio di excelencia y garantisa seguridad y orden publico di nos pais.