Korps Politie Aruba ALTOCOMISARIO RAMON ARNHEM A DUNA PRESTENACION NA UNIVERSIDAD DI ARUBA ENCONEXION CU CELEBRACION DI 40 AÑA DI STATUS APARTE

Santa Cruz, ARUBA: E aña aki Aruba ta marca su di 40 aña di Status Aparte. Den cuadro di e conmemoracion aki, Universidad di Aruba a organisa un evento special caminda a reflexiona cu orguyo y respet riba e logro historico aki tambe e desaroyo di e Pais den e ultimo cuater decadanan.

Durante e evento special menciona, caminda diferente orador a comparti nan vision riba e evolucion di nos isla, altocomisario sr. Ramon Arnhem, a duna un charla titula: “40 aña di Cuerpo Policial Aruba”.

Den su presentacion, sr. Arnhem a duna un bista general di e desaroyonan mas relevante den e seno di Cuerpo Policial di Aruba desde 1986. El a resalta con e institucion a crece, modernisa y adapta su mes na e exigencianan di un sociedad den cambio, semper cu e meta pa garantisa seguridad y orden publico.

E mensahe central di Arnhem tabata uno di gratitud y compromiso institucional.

“Cu honor y orguyo nos ta para riba e schoudernan di esnan cu a bay nos dilanti. Ta danki na nan fundeshi cu hunto nos ta responsabel awe pa e organisacion fuerte y profesional cu nos tin, sirbiendo comunidad di Aruba cu dedicacion.”

E participacion di Cuerpo Policial Aruba den e celebracion aki ta reafirma e compromiso di KPA pa sigui traha na bienestar di nos isla, honrando e pasado mientras ta construi un futuro sigur pa tur ciudadano.