Korte di Derechi Humano Oropeo ta konfirmá legalidat di detenshon di ekstranhero pero ta kritiká e ehekushon den 2019

Kompensashon di daño a wòrdu otorgá parsialmente – Kòrsou ta sigui ku reformanan.

 

Willemstad – Korte Oropeo pa Derechonan di Hende a determiná den su fayo di 21 di aprel 2026 (kaso nr. 001-249693) ku detenshon di ekstranhero na Kòrsou, komo tal, ta legal. Sin embargo, Korte a konkluí ku e manera ku e detenshon a wòrdu ehersé den 2019, na sierto punto, a bai kontra derechonan humano. Pues a otorgá solamente un parti di e kompensashon di daño ku e petishonarionan a pidi, i a rechasá un parti di e rekuesnan. Na mes momentu, Korte di Derechi Humano ta konfirmá ku Kòrsou den pasado a falta na garantisashon di dignidat humano, protekshon legal i trato di detenidonan.

Den su fayo, Hof ta hasi un distinshon kla entre e base legal di detenshon i e manera ku esaki a wòrdu apliká den práktika. No tin un violashon independiente di artíkulo 5 di EVRM (derecho riba libertat i seguridat), pasobra e detenshon tabata basá riba un fundeshi legal i ta forma parti di polítika migratorio permití.

Sin embargo, Hof a konstatá ku Kòrsou a violá artíkulo 3 di EVRM (prohibishon di trato inhumano òf degradante) i artíkulo 13 di EVRM (derecho riba un remedio efektivo). E violashonnan aki tin di aber ku e kondishonnan di detenshon i e posibilidat limitá pa personanan afektá di por kontestá nan situashon legalmente di manera efektivo.

E petishonarionan a pidi kada un €5.000 komo kompensashon, sin hasi diferensia entre daño material i inmaterial. Hof a rechasá un parti di e petishon aki i no a otorgá kompensashon pa daño material. Pa daño inmaterial, solamente un parti a wòrdu otorgá: kuater persona lo risibí €5.000 kada un debí na vários violashon konstatá, miéntras ku tres otro lo risibí €1.625 kada un pa un violashon limitá di artíkulo 5, paragraf 4 di EVRM.

E esensia di e fayo ta ku no e eksistensia di e polítika di ekstranhero mes ta bou di diskushon, sino e kalidat di su ehekushon i e garantisashonnan pa dignidat humano i protekshon legal.

Kòrsou ta enfatisá ku for di 2019 a keda traha aktivamente pa mehorá e ehekushon aki. Den e aña aki a kuminsá e programa “Optimalisering Vreemdelingsketen”, dirigí riba fortalesementu struktural di polítika, ehekushon i kolaborashon den e kadena, tambe komo reakshon riba e preshon migratorio kreyente den e region.

Den e periodo 2019 – 2025, a tuma pasonan konkreto pa atendé e puntonan di atenshon ku Hof a señalá. Asina, a invertí den un edifisio nobo, entrenamentu di empleadonan riba derechonan humano i aplikashon di artíkulo 3 di EVRM, i via e programa di hostmanship a enfoká riba un aproksimashon respetuoso i humano. Tambe a papia i mehorá prosesonan den e kadena di ekstranhero.

Ademas, a traha riba fortalesementu di protekshon legal dor di mehorá proseduranan, uso di ekspertisio hurídiko i hasi informashon mas aksesibel pa e personanan envolví, entre otro dor di digitalisashon i tradukshon di dokumentonan.

E mehoransa aki a wòrdu implementá bou di sirkunstansianan kompleho, manera e pandemia di COVID-19 i e preshon migratorio kontinuo den e region. Aun asina, a sigui traha konsekuentemente riba adaptashonnan struktural ku ta alinea ku normanan internashonal.

Kòrsou ta mira e fayo komo un konfirmashon ku e rumbo ku a tuma — dirigí riba un polítika di ekstranhero tantu legal komo humano — ta e rumbo korekto. Kòrsou lo sigui ku e rumbo aki i, unda ta nesesario, lo fortifik’é mas ainda, ku komo punto di salida ku detenshon solamente ta tuma lugá den un sistema ku ta kumpli ku eksigensianan di dignidat humano, kuido debido i protekshon legal efektivo.