Meteorological Department Curacao Lektura Públiko na Universidat di Kòrsou

Riba e anochi di djárason, 22 di aprel 2026, un lektura públiko riba tsunami a tuma lugá na Universidat di Kòrsou (UoC), ouspisiá pa Servisio Meteorológiko di Kòrsou.

Título di e lektura aki ta: “Nos tambe mester ta prepará pa un tsunami?”

Direktor di Servisio Meteorológiko, Dr. Albert Martis, a habri e seshon i introdusí Dra. Silvia Chacón Barrantes, profesor titular na Departamento di Físika di Universidad Nashonal di Costa Rica, kende a splika kon tsunamí ta forma, ku temblor komo kousa prinsipal, i e peliger i rapides ku esaki por sosodé.

Despues, Christa von Hillebrandt-Andrade, MSc., gerente di e “U.S. National Weather Service Caribbean Tsunami Program” i ex-direktora di “Puerto Rico Seismic Network”, a papia riba e 12 indikadónan pa ta “Tsunami Ready”, enfatisando preparashon di komunidat, edukashon, sistema di alerta i reakshon koordiná. A enfatisá tambe ku kada persona mester tuma akshon mesora sin warda pa outoridatnan.

Na final, e públiko a haña oportunidat pa hasi preguntanan i deliberá ku e oradónan.

Mas ku 90 persona ku tabata presente a disfrutá i tabata satisfecho ku e lektura edukativo i interaktivo aki.

Servisio Meteorológiko di Kòrsou lo sigui riba e trayekto pa konsientisá komunidat riba e riesgonan, preparashon i responsabilidat personal pa loke ta trata tsunami.