Deliberashon ku Minister di Trafiko, Transporte i Planifikashon Urbano enkuanto planifikashon pa Edifisio Nobo (inkluso ruta pa atkisishon di tereno).

Djabièrnè, 24 di aprel 2026, na inisio di e reunion di Komishon Sentral, Minister di Tráfiko, Transporte i Planifikashon Urbano, sr. Charles Cooper, a duna un introdukshon siguí pa introdukshon di representantenan di Stichting Monumentenzorg, Stichting Monumentenfonds, Stadsherstel Willemstad N.V. i Direktorado di Kontrol di Riesgo i Maneho pa Kalamidat, tokante edifisionan históriko den nos sentro di siudat ku ta den estado deplorabel i ku por trese un riesgo serio pa seguridat públiko.

Presidente di Parlamento, sr. Fergino Brownbill, a indiká ku lo tin dos tanda di pregunta, promé tanda di 15 minüt i e di dos tanda di 10 minüt. Despues di e introdukshonnan, Presidente di Parlamento sr. Fergino Brownbill a habri e promé tanda pa Miembronan di Parlamento por hasi pregunta na e representantenan i tambe na Minister sr. Charles Cooper. Na final di e preguntanan den promé tanda, Minister Cooper a pidi algun ora pa prepará e kontestanan i posiblemente manda algun kontesta por eskrito. Akinan miembro di Parlamento, sr. Seferina a bini ku un proposishon di òrdu pa skòrs e punto 1 i duna Minister Cooper espasio pa prepará tur kontesta. Komishon Sentral a bai di akuerdo ku e proposishon aki. Presidente di Parlamento a skòrs punto 1 te ku un próksimo aviso i skòrs e reunion pa masoménos dos ora pa trata punto 2.

Despues a reanudá e reunion i trata e di punto 2 di agènda, kual ta proposishon di biahe pa Hulanda tokante “IPKO” na yüni 2026. Miembronan di Parlamento a aprobá e proposishon.

Finalmente, Presidente di Parlamento a skòrs e reunion te ku próksimo aviso.