Krioyo Film Festival 2026 – Fechanan Ofisial i Entrega di Produkshon
Krioyo Film Festival 2026 – Fechanan Ofisial i Entrega di Produkshon
WILLEMSTAD — Krioyo Film Festival ta orguyoso di anunsiá ku Film Commissioner, Sra. Eloise van Wikkeren, a bai di akuerdo ofisialmente ku e fechanan pa di tres edishon di Krioyo Film Festival 2026 (KFF26).
E festival lo tuma lugá for di 25 di òktober 2026, ku e premiere pa invitadonan, te ku 1 di novèmber 2026, kaminda públiko lo por disfrutá di un selekshon amplio di produkshonnan den idioma Papiamentu for di e islanan ABC. Esaki lo tuma lugá den Caribbean Cinemas na Sambil.
E fecha límite pa entrega di produkshonnan ta 1 di yüli 2026. Produktornan por entregá nan trabòu—sea dokumental, pelíkula largu òf kòrtiku—via di e plataforma internashonal FilmFreeway, kaminda tambe tur rekisítonan i kriterianan di partisipashon ta disponibel.
KADUSHI DI ORO
Manera un i tur sa, e produkshonnan ku mas a destaká lo kualifiká pa gana e prestigioso premio Kadushi di Oro, un rekonosementu di ekselensia den industria di film lokal.
E kategorianan pa gana un Kadushi di Oro ta inkluí:
- Mihó Pelikula Largu
- Mihó Kortiku
- Mihó Dokumental
- Mihó Direktor
- Mihó Aktor
- Mihó Aktrís
- Mihó Guion (Script)
- Mihó Sinematografia
- Mihó Edishon
- Premio di Publiko
Pa mas informashon, interesadonan por tuma kontakto ku nos via email: krioyofilmfestival@gmail.com òf via WhatsApp na +599 9 564 7788.
Ban sigui produsí pelíkula na Papiamentu i pone nos kultura riba mapa!
