” Ban introdusí statiegeld general pa kombatí sushi i ku posibilidat pa aportá na deporte via un fondo pa deporte”

 

” Ban introdusí statiegeld general pa kombatí sushi i ku posibilidat pa aportá na deporte  via un fondo pa deporte” 

Resientemente Omar Gill a manda un karta na Parlamento ku un proposishon pa  evaluá e introdukshon di un sistema di statiegeld general, mará na un fondo pa deporte i/òf desaroyo di hubentut.  

Den su karta, Gill ta indiká ku sushi a bira un problema visibel ku ta kresiendo  diariamente riba nos isla. Bòter i bliki nan uza ta terminá den diferente bario, riba kaya i  tambe den naturalesa. Segun Gill esaki no solamente ta afektá nos medio ambiente i  imágen pero tambe nos kalidat di bida. Gill: ”Ban duna bòter i bleki balor agregá i  terminá sushedat”. 

Na mes momentu, e karta ta pone énfasis riba e situashon sosial ku hopi famia ta  enfrentá aktualmente. Gill ta referí na diferente rapòrtnan di instansianan manera  Centraal Bureau voor de Statistiek i Sociaal-Economische Raad, indikando ku pobresa  ta sigui oumentando. Den práktika skolnan, organisashonnan deportivo i di hubentut ta  eksperensia ku no tur mucha tin e posibilidat pa partisipá den deporte òf disponé di  materialnan básiko nesesario. Komo presidente di un sentro di deporte, e ta  eksperensia esaki diariamente. Gill ta na altura ku dosentenan ta kontribuí na skol i sa  ku tin algun parlamentario tambe ta hasi donashon di watercooler, kama, mesa i otro  materialnan. 

Loke Gill ta proponé ta basa riba e sistema di statiegeld ku ta wòrdu usa na Hulanda pa  bòter i blikinan. Na Hulanda, hende por entregá nan material ku statiegeld na diferente  punto (supermarket, skolnan, gimnasio) i por skohe pa duna e balor na  organisashonnan pa deporte i/òf sosial. 

Segun Gill, un sistema similar por wòrdu evaluá lokalmente, kaminda e persona ku  entrega bòter òf bleki, por skohe pa laga nan statiegeld bai direktamente den un fondo  pa deporte pa asina sostené deporte i desaroyo di nos hubentut. 

Den su karta, Omar ta pidi Parlamento, i spesífikamente e komishon di IPKO, pa  konsiderá e posibilidat di trese e tema aki dilanti durante e próksimo IPKO, yüni 2026,  na Hulanda.  

E idea ta pa pidi un seshon di konosementu tokante implementashon di e sistema di  statiegeld na Kòrsou, pa asina por siña for di e eksperensia nan ku Hulanda ya tin.  

No mester inventá e wil di nobo.  

“Nos por usa un solo sistema pa kontribuí na un isla mas limpi i na mes momentu  sostené nos deporte i hubentut,” Gill a terminá bisando.