Di Deseo pa Realidat: 12 Famia ku un Komienso Nobo

Willemstad – Djabièrnè, 8 di mei 2026, Minister sra. Charetti America di e Ministerio di Desaroyo Sosial, Labor i Bienestar a hiba palabra durante di un seremonia, kaminda a entregá yabi di kas na 12 famia pa medio di e proyekto Mi Kas Awor. Den e diskurso aki, minister a selebrá e gran logro aki, i a rekonosé ku apesar di algun reto eksistente, e logro aki ta demostrá ku nos por logra hopi ora institushonnan traha konhuntamente pa mehorá kalidat di bida di nos pueblo.

Diskurso di Minister SOAW:

Bon tardi invitadonan,

Awe ta un momentu hopi spesial. No solamente pa e diesdos famianan ku lo risibí nan yabi awor aki, pero tambe pa tur persona ku a kontribuí na e proseso aki pa e por a bira un realidat.

Komo Minister di Desaroyo Sosial, Labor i Bienestar, mi ta konsiente ku hopi famia a spera ku pasenshi pa e momentu aki yega. En general, proyektonan di bibienda ta pasa den diferente fase tékniko, atministrativo i organisatorio ku mester wòrdu atendé na un forma responsabel, pa garantisá ku tur kos ta tuma lugá di un manera korekto i sostenibel. Pero awe nos por mira resultado konkreto di e trabounan ku a wòrdu hasí.

Awe, diesdos famia ta haña e oportunidat pa kuminsá un etapa nobo den nan bida ku mas trankilidat, seguridat i stabilidat. Pasobra na final di kuenta, esei ta loke e yabi aki ta representá:

no solamente un kas, sino un hogar. Un lugá kaminda muchanan por krese den seguridat, kaminda mayornan por mira nan futuro ku mas konfiansa i kaminda famianan por haña perspektiva nobo.

P’esei mi ke ekspresá mi apresio na Ministerio di VVRP, FKP, tur instansianan envolví, tur partnernan i tambe e ekipo di SOAW ku a sigui traha ku gran kompromiso pa hasi esaki posibel. Esaki ta mustra kiko nos por logra ora institushonnan traha huntu ku un meta komun: mehorá kalidat di bida di nos pueblo.

Na mes momentu, nos ta realístiko ku ainda tin un reto grandi di bibienda na Kòrsou. Tin hopi famianan i hóbennan ku ainda ta buskando un kas pagabel i un oportunidat hustu pa nan por traha riba nan futuro ku dignidat. Pa e motibu aki, nos mester sigui invertí den solushonnan struktural i sostenibel pa futuro, i hustamente p’esei e proyekto Mi Kas Awor ta asina importante.

Mi Kas Awor no ta trata solamente konstrukshon di kasnan. E enfoké prinsipal di Mi Kas Awor ta pa krea oportunidatnan, pa asina duna famianan un fundeshi firme pa nan por sigui traha, krese i desaroyá independientemente. Nos mester ta realístiko tambe pa loke ta trata e espasio limitá ku nos tin riba nos dushi isla Kòrsou. P’esei nos lo mester sigui konstruí na un manera mas inteligente i efisiente, ku un vishon pa futuro. Adaptashon ta nesesario si nos ke logra duna mas famia akseso na kasnan digno i pagabel.

Komo Minister di Desaroyo Sosial, Labor i Bienestar, mi ta sigui komprometé mi mes, huntu ku mi ministerio i tur partnernan relevante, pa sigui buska i implementá solushonnan ku ta fortalesé seguridat di bibienda i bienestar sosial na Kòrsou.

Na e diesdos famianan ku awe ta risibí nan yabi, mi ke bisa:

• Nos por traha kas pa boso, pero ta na boso pa hasi di dje un hogar.  
• Un hogar ku normanan i balornan fuerte.  
• Un hogar yen di amor, respèt i komprondementu.  
• I mas ku tur kos, un hogar kubrí ku hopi orashon.
• Mi ta spera ku e kas aki lo bira un lugá di trankilidat, progreso, speransa i bendishon pa boso i boso famia.
• Di kurason, pabien i hopi bendishon.
• E kaminda no ta semper kòrtiku, pero ku perseveransia i kolaborashon, nos ta sigui avansá.
• E kaminda ta largu, nos ta yega si.