Kandela na Kaya Telekomunikashon ta dominá pero lo tin molèster di huma ainda
Gobièrnu di Kòrsou
Kandela na Kaya Telekomunikashon ta dominá pero lo tin molèster di huma ainda
Publiká riba 12 Mei 2026
Willemstad – Brantwer Kòrsou tin e kandela ku a kuminsá awe, 12 di mei na Kaya Telekomunikashon, kompletamente dominá. Brantwer ta sigui hasi su trabounan durante algun ora mas i despues ta reanudá esaki bèk mañan mainta.
Aktualmente no tin mas peliger di kandela, pero ainda tin bastante huma ku ta kousando molèster den área di Rooi Santu i besindario. Segun Brantwer, e situashon ta bou di kontrol i no tin ningun peliger inmediato pa habitantenan.
Ta trata di un kandela ku a pega den kuater di e diessinku konteiner presente riba e tereno na Kaya Telekomunikashon 180. Den e konteinernan tabatin diferente tipo di material kímiko, manera produkto pa limpia pisina i bòter di gas pa yena èrko. Esaki a hasi e situashon delikado pa motibu di posibel eksploshon i molėster di huma.
Pa permití ku trabounan di Brantwer i di investigashon por kontinuá sin problema, parti di e área rondó di Kaya Telekomunikashon lo keda será temporalmente. Outoridatnan ta pidi públiko pa sigui instrukshonnan i usa ruta alternativo si ta posibel.
Aunke ku e kandela ta dominá, ainda por tin molèster di huma durante e próksimo oranan.
Brantwer ta pidi habitantenan den e área di Rooi Santu i besindario pa mantené porta i bentananan será den kaso ku bo ta na kas i no mester a evakuá. Laga bestianan di kas keda paden por lo pronto i no sende èrko pa evitá ku e aire di pafó ta drenta kas tòg.
Sigui kanalnan ofisial pa mas informashon i último desaroyonan.
