Prome Minister di Aruba Mike Eman su bishita na Hulanda
Prome Minister di Aruba Mike Eman su bishita na Hulanda
Diahuebs atardi na Den Haag, Prome Minister mr. Mike Eman a reuni cu vice-presidente di Raad van State di Hulanda, mr. Thom de Graaf. E encuentro tabata tambe un momento pa expresa reconocemento p’e rol cu de Graaf a destaca den ultimo añanan como un di e principal lidernan institucional na Hulanda. E reunion aki ta tuma lugar den un momento special, considerando cu Thom de Graaf a anuncia recientemente cu el lo laga su funcion como vice-presidente di Raad van State entrante 1 di juli 2026. Prome Minister tabata hunto cu su delegacion acompaña pa Andy Lee, kende ta staatsraad pa Aruba na Raad van State, secretario general di Ministerio di Asunton General Robert Candelaria y Indra Duarte, Secretario di Conseho di Minister.
Prome Minister Mike Eman a comparti entusiasmo tocante e siguimento cu ta duna na e Memorandum of Understanding (MoU) firma recientemente entre Aruba y WUR, cu meta pa explora e posibilidad di establece un presencia academico y cientifico di WUR na Aruba. Na su turno André van Lammeren, director general nobo di Environmental Sciences Group na WUR ta admira e potencial cu nos isla por brinda e region. “Tin hopi entusiasmo pa sigui explora hunto con nos por haci esaki bira realidad. E entusiasmo cu nos ta mira tanto na Prome Minister Mike Eman como tambe na WUR ta realmente inspirador,” André van Lammeren a expresa. Segun Van Lammeren, e vision ta bay mucho mas leu di solamente educacion academico. E ta enfoca tambe riba aplicacion practico di conocemento y investigacion pa logra impacto concreto den comunidad y den medio ambiente. “E no ta trata solamente di conocemento y estudio fundamental. E ta trata tambe di con nos ta aplica e conocemento y estudionan realisa en practica pa realmente mira cambio y resultado concreto,” el a comenta.
Prome Minister Eman den reunion cu Minister di Asunto Economico Heleen Herbert.
Minister Herbert a expresa entusiasmo tocante e vision y ambicion cu Aruba ta mustra pa futuro. “Mi a haya hopi energia for di e reunion aki pasobra mi ta sinti cu tin hopi ambicion na Aruba. Aruba ta pensa den varios oportunidad y tin deseo pa logra progreso door di cooperacion,” minister Herbert a declara despues di e reunion. Ademas, ambos delegacion a delibera rib’e futuro di e tereno di refineria y e posibilidadnan pa duna e area un destino economico nobo cu por atrae inversion y actividadnan empresarial moderno.
Minister Herbert a indica tambe cu Hulanda ta mira varios oportunidad concreto pa contribui na e proceso aki y pa sigui stimula cooperacion economico entre ambos paisnan. “Nos ta mira diferente oportunidad pa sigui desaroya Aruba como un centro pa diferente forma nobo di haci negoshi,” minister Herbert a añadi. Gobierno di Aruba ta considera e reunion aki como un paso importante den e fortalece e relacion entre Aruba y Hulanda, cu enfasis riba desaroyo economico sostenibel, innovacion y inversion den futuro di nos pueblo
Prome Minister Mike Eman ta destaca importancia di unidad y continuidad den un mundo cu hopi turbulencia. Diahuebs tardi na Den Haag, Prome Minister mr. Mike Eman a reuni cu Prome Minister di Hulanda, Rob Jetten, den cuadro di fortalece e dialogo continuo entre Aruba y Hulanda tocante diferente tema strategico pa futuro di Aruba y Reino Hulandes.
Durante e encuentro, a dialoga tocante diferente proyecto cu Aruba y Hulanda ta desaroyando hunto, incluyendo e progreso riba e tema di e EU preclearance y tambe e Memorandum of Understanding (MoU) cu Wageningen University & Research (WUR). Segun Prome Minister Eman, e cooperacionnan aki ta habri caminda pa innovacion, desaroyo economico y sostenibilidad pa Aruba. “Nos a delibera awe tocante diferente siguimiento di varios desaroyo cu nos a construi hunto cu Aruba. E tema di e EU preclearance y e cooperacion cu WUR ta ofrece hopi oportunidad pa futuro di nos isla,” Prome Minister Mike Eman a declara despues di e reunion.
Tambe a dedica atencion n’e proximo Conferencia di Reino, caminda diferente paisnan di Reino lo reuni pa dialoga riba varios interesnan comun y futuro di cooperacion den Reino. Den e contexto aki, Aruba a pone enfasis riba diferente tema internacional y strategico cu ta relevante pa posicion di Reino den un mundo moderno
Gobierno di Aruba diahuebs atardi a tene un reunion importante cu Minister di Defensa di Reino Hulandes esta Dilan Yeşilgöz-Zegerius, den cuadro di fortalece e cooperacion strategico entre Aruba y Reino riba tema di defensa, estabilidad regional y siguridad. Durante e encuentro, Prome Minister mr. Mike Eman a intercambia pensamento cu e minister tocante e situacion geopolitico actual den region, e importancia di cooperacion entre e paisnan di Reino y e papel esencial cu defensa ta hunga den proteccion di e integridad teritorial di Aruba y Caribe Hulandes.
E area di e refineria tin hopi perspectiva y reto grandi manera limpiesa y rehabilitacion, pero e area tin tambe enorme potencial pa Aruba. Durante e sesion di brainstorming, diferente experto y tecnico di Rijksvastgoedbedrijf, Ministerio di Asuntonan Economico y Ministerio di Interior y Relacionnan di Reino a comparti nan experiencia y conocemento cu por contribui na e proceso di desaroyo di e area aki. Prome Minister Eman a enfatisa cu Aruba ta busca combina e experiencia Hulandes cu e conocemento local di diferente ministerio, stakeholder y instancia manera Refineria di Aruba N.V. (RdA) pa crea un vision realista y prometedor p’e area aki. “Nos ta mira un oportunidad grandi pa combina e experiencia amplio di gobierno Hulandes cu e experiencia y conocemento local di Aruba,” Prome Minister a expresa. Segun e delegacion di Aruba, e reunion a resulta den compromiso concreto pa sigui cu e proceso den e siguiente simannan.
“Nos a yega na compromiso cu dentro di dos siman lo presenta algun idea concreto di e direccion pa sigui y p’e expertonan aki por bishita Aruba y reuni cu nos stakeholdernan local,” Prome Minister Eman a declara. Gabinete AVP-Futuro ta considera e proyecto aki como un proyecto di importancia strategico pa futuro economico di Aruba y pa crea varios portunidad nobo di inversion y desaroyo. “E decisionnan cu nos ta tuma awor lo ta sumamente importante pa futuro di Aruba,” Prome Minister Mike Eman a conclui.
Den un ceremonia elegante den Nieuwe Kerk na Den Haag, Gobierno di Aruba a instala oficialmente señora Mildred Schwengle como Ministro Plenipotenciario di Aruba na Hulanda. E anochi special a reuni un amplio grupo di invitadonan distingui, incluyendo embahadornan, representantenan diplomatico, miembro di Parlamento Hulandes, lidernan politico, representantenan di Reino Hulandes y huespednan di diferente sector di sociedad Hulandes y Caribe Hulandes. Minister Gerlien Croes y Minister Geoffrey Wever tambe tabata presente durante e atardi importante aki pa Aruba. E ceremonia a tuma lugar den un atmosfera di orguyo nacional y reflexion historico, caminda tambe a conmemora 40 aña di Status Aparte y 50 aña di Himno y Bandera di Aruba.
Prome Minister mr. Mike Eman a reuni diaranson mainta den Tweede Kamer der Staten-Generaal cu lider di fraccion di Volkspartij voor Vrijheid en Democratie (VVD), Ruben Brekelmans, esaki den cuadro di e bishita oficial di delegacion di Gabinete AVP-Futuro na Hulanda.
Durante e encuentro, a dialoga riba diferente oportunidad pa fortalece e cooperacion dentro di Reino Hulandes, cu enfoke special riba desaroyo economico, siguridad, innovacion y intercambio di conocemento.
Prome Minister Eman a destaca cu Aruba ta sigui busca manera pa amplia e relacionnan strategico cu partnernan na Hulanda, basa riba respet mutuo y varios interes comun.
“Si nos mira kico ta uni nos y unda tin oportunidadnan, sigur cu nos lo descubri hopi posibilidadnan nobo pa progreso di Aruba y Reino,” segun Prome Minister Mike Eman. Un di e tema principal cu a atende tabata e reciente firma di un MoU cu Wageningen University & Research pa establece un presencia permanente di e instituto na Aruba. E iniciativa aki tin como meta pa desaroya Aruba como un centro di conocemento riba sostenibilidad, naturalesa y siguridad di alimento, cu potencial pa comparti conocemento cu nos region.
Tambe a dialoga rib’e cooperacion entre Aruba, KLM, Royal Schiphol Group y Aeropuerto Internacional Reina Beatrix pa investiga e posibilidad di un sistema di EU preaclearance na Aruba, algo cu por fortalece posicion strategico di Aruba como hub internacional.
Prome Minister mr. Mike Eman, hunto cu vice-prome minister mr. Gerlien Croes y Minister Plenipotenciario mr. Mildred Schwengle, a reuni diamars atardi cu miembronan di e Comision Fiho pa Relacionnan di Reino di Eerste Kamer der Staten-Generaal na Den Haag, Hulanda. Durante e reunion, delegacion di Aruba a comparti e vision y prioridadnan di Gabinete AVP-Futuro tocante desaroyo economico, bienestar social y fortalecemento di cooperacion den Reino Hulandes.
Prome Minister Mike Eman a bisa cu Gobierno ta “sumamente contento” cu e oportunidad pa tene un dialogo habri cu e comision, unda Aruba por a duna un bista amplio di e direccion cu pais ta tumando. “Nos ta hopi contento cu e desaroyo cu Aruba a logra. Nos economia ta creciendo, nos industria turistico ta fuerte y Aruba tin e entradanan per capita cu ta destaca den region. Nos tin un fondo financiero fuerte y un presupuesto balansa,” Prome Minister Eman a declara.
Sin embargo, Prome Minister a enfatisa cu Gobierno ta wak cu preocupacion con e progreso economico no semper tur ciudadano riba nos isla ta logra sinti esaki.
Reunion cu secretario di estado Eric van der Burg a resalta compromiso entre Aruba y Hulanda pa progreso di nos isla
Prome minister mr. Mike Eman, hunto cu minister mr. Gerlien Croes, y minister plenipotenciario di Aruba, mr. Mildred Schwengle, a forma parti diaranson di un reunion cu secretario di estado Eric van der Burg den cuadro pa fortalece e cooperacion entre Aruba y Hulanda.
Durante e encuentro, a revisa e diferente tema cu a discuti anteriormente durante e bishita di ex-prome minister Dick Schoof aña pasa na Aruba y siman di prome minister Rob Jetten. Gabinete AVP-Futuro a enfatisa importancia di sigui construyendo rib’e entendimentonan y acuerdonan alcansa entre ambos pais. Prome Minister Eman a expresa su aprecio p’e interes cu secretario di estado Van der Burg ta mustra den e desaroyo sostenibel di Aruba y den fortalecemento di e relacionnan dentro di Reino
Presidente di e Comision fiho pa Relacionnan di Reino (KOREL) di Eerste Kamer der Staten-Generaal, Paul Rosenmöller (GroenLinks-PvdA awor yama Progressief Nederland), a resumi e reunion cu delegacion di Gabinete AVP-Futuro como un encuentro “hopi habri, informativo y constructivo”, caminda a dialoga riba diferente tema importante pa futuro di Reino.
Durante e reunion cu Prome Minister mr. Mike Eman, vice-prome minister mr. Gerlien Croes y Ministro Plenipotenciario mr. Mildred Schwengle, a dialoga abiertamente tocante diferente reto y oportunidad cu Reino Hulandes ta enfrenta, incluyendo e “geschillenregeling”, e proximo conferencia di Reino (Koninkrijksconferentie) y e diferencia entre bienestar economico y bienestar social. Rosenmöller a indica cu un di e puntonan central den e reunion tabata e preocupacion comparti tocante e cantidad di persona cu ainda ta biba bou di e “bestaansminimum” .
“Nos a papia tocante e diferencia entre “welvaart” y “welzijn”, y tambe e porcentahe di hende cu ta biba bou di e “armoedegrens”. Aruba kier crea mas perspectiva pa su pueblo, y esey no ta un reto solamente pa Aruba, pero pa henter Caribe Hulandes den nos Reino,” Rosenmöller a declara
639114718427035"
639114718427035"



































