Kòrsou, 25 mei  2026 

 

Segun Frenciss “Renny” Lourens, parlamentario pa MFK

Problemanan di Domeinbeheer ta rekerí solushonnan struktural,

no teatro polítiko

 

Promé ku tur, nos ta ekspresá nos pleno konfiansa i sosten na e trabou ku Minister Charles Cooper ta realisando na interes di pueblo i komunidat di Kòrsou. Nos no por ninga ku Minister Cooper a heredá un situashon sumamente kompleho  den Domeinbeheer, ku durante hopi aña no a wòrduatendé ni resolvé di forma adekuá dor gobièrnunan anterior.

E problemanan ku awor ta sali na kla no a surgi di un dia pa otro. E gran retraso den proseso di petishonnan, e falta di aktualisashon atministrativoi diferente defisiensianan organisativo ta konsekuensia di problemanan ku a bin ta akumuládurante hopi aña. 

Sinenbargo, e gobièrnu aktual no ta skonde ni kore pa e desafíonan aki. Al kontrario, tin trabòu serio, responsabel i struktural ta wòrdu realisá na e momentunan aki pa modernisá prosesonan, pone mas órden den atministrashon, mehorá mekanismonan di kontròl i garantisá ku e sistema por funshoná di un manera mas hustu, efisiente i transparente pa tur siudadano.

Nos ta komprondé e frustrashon di hopi hende ku ta warda pa un solushon òf pa un kontesta riba nan petishonnan. Sin embargo, ta importante pa pueblo komprondé ku problematikanan struktural di e magnitut aki no por wòrdu resolvé di un dia pa otro. Reformanan serio, maneho responsabel i planifikashon sostenibel inevitablemente ta tuma tempu.

 

P’esei, nos ta hasi un yamada na tur sektor konserní pa kontribuí ku proposishonnan konstruktivo, kolaborashon i sosten, en bes di alimentá mas deskonfiansa i tenshon den komunidat. Pueblo di Kòrsou mester di speransa, stabilidat i liderazgo ku ta enfoká riba solushonnanreal i duradero na benefisio di nos pueblo.

MFK lo sigui traha ku determinashon pa pone órden den Domeinbeheer, restablesé konfiansa den gobièrnu i garantisá ku e interes di pueblo di Kòrsou lo keda semper na promé lugá.

 

Atentamente, 

Frenciss “Renny” Lourens,

parlamentario pa

frakshon di MFK