Giselle Mc William AKSESO LIBER NA PLAYA PA PUEBLO

Frakshon di MAN-PIN den Parlamento a entregá un petishon ofisial na Presidente di Parlamento pa organisá un Reunion Públiko ku komo tema sentral: maneho di gobièrnu relashoná ku aksesibilidat di pueblo na playanan di Kòrsou.

MAN-PIN ta bisa ku playanan ta parti di nos rikesa natural i kultura, i mester keda aksesibel pa tur hende di Kòrsou. Frakshon ta mustra su gran preokupashon ku e tendensia di komersialisashon i privatisashon di playanan, kaminda pueblo kada biaha ta sinti ku aksesibilidat liber ta bira mas limitá.

Den e petishon, MAN-PIN ta señalá ku hopi famia lokal ta eksperensiá opstákulonan pa disfrutá di playa manera tradishonal, pa motibu di kostonan haltu, uso eksesivo di stùl i fasilidatnan komersial, i situashonnan kaminda parti di playa ta reservá primordialmente pa turista. Segun frakshon, playa no por bira un luhó pa esnan ku por paga, sino mester sigui un espasio públiko pa rekreashon, deporte, salubridat i union familiar.

Frakshon tambe ta pidi mas transparensia tokante kontratonan i akuerdonan di maneho di playa entre gobièrnu i sektor privá. Pueblo tin derecho di sa kiko ta e kondishonnan i kon ta garantisá akseso liber na nos playanan.

MAN-PIN a pidi ku e minister di Tráfiko, Transporte i Planifikashon Urbano, huntu ku e minister responsabel pa Medio Ambiente i Naturalesa, ta presente durante e reunion públiko pa duna klaridat riba e vishon i maneho di gobièrnu.

Pa MAN PIN nos playanan ta di nos pueblo. Nos mester protehá aksesibilidat, inklusividat i e derecho di kada hende di por disfrutá di laman sin barrera finansiero ni privatisashon eksesivo