Tráfiko, Transporte i Planifikashon Urbano: VVRP ta desaprobá tur tipo di komportashon no-deseá durante wega deportivo.

Willemstad – Den kuadro di su afan pa motivá empleadonan pa ta sosialmente envolbí den nos komunidat, VVRP a partisipá ku un ekipo den e torneo di futbòl ‘Dushi Cup’. E torneo a tuma lugá riba djadumingu, 24 di mei último. E torneo tabata kanando den un ambiente positivo.

Banda di 6.00pm, un miembro di e ekipo di VVRP a komportá su mes den un forma inkorekto. Den un hugadá, kisas un poko fuerte, un hungadó di e tim kontrali, FC Bende, a keda agredí.

Despues di e agreshon aki, e ambiente a bira tumultoso i e rèfri a disidí pa skòrs e wega. Despues di hopi interkambio, kaminda den un promé instante, a disidí ku ta finalisá e wega entre VVRP i FC Bende, e organisashon di e torneo a tuma un otro desishon pa deskualifiká VVRP i eksigí ku henter e ekipo di VVRP mester bandoná SDK. Tur kolega di VVRP a hasi esaki trankilamente i a haña bon koperashon di e kuerpo di seguridat na SDK.

Mester bisa ku VVRP ta desaprobá  e komportashon di e miembro di e ekipo aki. P’esei mesora ku e kos a pasa, a hiba e hungadó na e tènt di VVRP, a papia hopi serio ku e kolega ku a faya, i a splik’é ku e loke a pasa no ta kuadra ku e prinsipio i normanan di deporte ni di VVRP, i ku no ta tolerá esaki.

E kolega ayera mes a pidi despensa pa su komportashon. Mientras ku VVRP ta duna tur koperashon na kualke investigashon ku mester keda hasí den e kaso lamentabel aki, ya a tuma e desishon interno ku e kolega aki por lo pronto lo no por partisipá den ekiponan deportivo di e organisashon.