Fundashon Negoshi Pikiña ta firma MoU ku IrSais

 

Fundashon Negoshi Pikiña ta nombra Ir-Sais embahador di bon boluntat

WILLEMSTAD – Durante un evento ku a tuma lugá na Restaurant Quatre Vins na Santa Rosaweg, presidente di Fundashon Negoshi Pikiña (FNP) Kòrsou, i presidente di Fundashon Negoshi Pikiña Boneiru, a firma un MoU (memorando di entendimentu) ku e artista Ir-Sais pa e último aki bira un embahador di bon boluntat pa e fundashon i tambe pa Global Entrepreneurship Week, Dutch Caribbean ku ta un proyekto di FNP.

Den su diskurso, Elgenia Pieternella, a bisa ku e enkuentro di djaweps 28 di di Mei ta mas ku un evento pa firma un MoU. “E ta realisashon di konekshon entre kultura i entrepreneurship. Entre inspirashon i edukashon. I mas importante aun komo un paso direkshon di un futuro den kua nos hóbenan por mira logro di ‘role model’ nan i ta usa esaki komo estímulo pa deskubrí nan propio talentonan. I asina haña motivashon pa traha duru pa desaroyá nan talentonan,” e presidente di FNP Kòrsou i GEW Curaçao a sigui bisa.

“Nos ta kere den nos artistanan, ku ta personanan kreativo, inovadó, i emprendedó. Nan mester bira parti di e eko-sistema den kua nos hóbennan ta lanta. No solamente pa entretené pero tambe pa inspirá i guia nos hóbennan. Ir-Sais ta representá mas ku músika. E ta representá vishon, disiplina, perseveransia, orguyo kultural i ambishon. Su kreashonnan a bira konosí internashonal, sin ku el a pèrdè e konekshon ku su raïs.” 

Seguidamente a hiba palabra Amilea Pieternella, presidente di Fundashon Negoshi Pikiña Boneiru. El a bisa ku pa vários aña FNP Boneiru a bin ta traha enfoká pa fortifiká entrepreneurship pa medio di hasi konekshon, promové inovashon i kolaborashoni pa etalá nos talento lokal na nivel global. “Tambe nos a traha inkansablemente, huntu ku e team di GEW Bonaire, i nos spònsòr i partnernan, riba kresementu di e sektor di empresa chikí, desaroyo di hubentut i sostenibildat ekonómiko. Komo parti di nos efuersonan pa fortifiká insiativanan empresarial ku hopi orguyo nos ta anunsiá firmamentu di un Mou ku Ir-Sais. E kolaborashon ta representá un logro importante den konstruí ‘partnerships’ fuerte, ku mester aportá den empoderashon di nos hóbennan, i entrepreneurship sostenibel.”   

Ir-Sais di su trurno a bisa ku e ta onrá di ser nombrá komo un embahador di bon boluntat pa Fundashon Negoshi Pikiña Boneiru i Kòrsou. “E akuerdo di kolaborashon aki mi ta mira komo fortifikashon di mi propósito pa inspirá, guia i aportá na desaroyo di nos hóbennan. Mi tin hopi idea i plan ta kana kuné, i tur dia ta bini mas aserka. Ku e akuerdo aki  nos ta uni forsa pa desaroyá ideanan i ehekutá nan. Pa asina stimulá outo-estima di nos hóbennan, i motivá nan pa ta empredendónan inovativo i resiliente.”