Ministerio di Hustisia ta invitá pueblo pa djòin e evento : Mi Motibu pa Sirbi mi Pais

Un dia di informashon, orientashon i oportunidatnan di trabou

Willemstad – Ministerio di Hustisia ta kontinuá invertí den hende i den futuro di Kòrsou ku e kampaña “Mi Motibu pa Sirbi mi Pais”. Komo parti di e kampaña aki, Ministerio di Hustisia ta invitá tur hende ku interes den un karera den sektor di hustisia pa bishita Ministerio djasabra 30 di mei pa risibí informashon, orientashon i guia riba e diferente oportunidatnan di trabou ku ta disponibel aktualmente.

For di aprel último, Ministerio di Hustisia a habri vários vakatura pa fortifiká diferente organisashonnan ku ta kontribuí tur dia na seguridat, órden públiko i protekshon di nos komunidat. Algun di e vakatura nan aki lo sera djadumingu, 31 di mei 2026. P’esei, Ministerio di Hustisia ta enkurashá tur persona ku a entrega un solisitut, òf ku ainda tin pregunta tokante e proseso di reklutashon, pa pasa djasabra aki entre 10:00 di mainta i 1:00 di mèrdia na Ministerio di Hustisia na Punda.

Durante dia, personanan por risibí asistensia pa verifiká si tur nan dokumentonan nesesario, manera CV, karta di motivashon i otro dokumentonan relevante, a wòrdu entregá korektamente. Tambe lo tin personal presente pa respondé pregunta i duna orientashon riba e diferente trayektonan profeshonal den sektor di hustisia.

Oportunidatnan pa hóbennan ku ke sirbi Kòrsou

Ademas di e vakatura ku ta sera dia 31 di mei, Ministerio di Hustisia ta informá ku e vakatura pa Aspirante di Polis, Aspirante di Bombero i Beveiliger na SDKK a habri i tin oportunidat pa solisitá te ku dia 31 di ougùstùs 2026.

E oportunidat aki ta destiná pa hóbennan di 17 aña òf mas ku tin deseo di kontribuí na un Kòrsou mas sigur i mas fuerte. Un karera den e organisashonnan aki no solamente ta representá un trabou, sino tambe un yamada pa sirbi komunidat, protehá hende i traha pa bienestar di nos isla.

Tur interesado por hasi nan solisitut online na www.traboudenhustisia.com. Pa esnan ku ainda no tin un CV digital, Ministerio di Hustisia lo pone fasilidat disponibel e djasabra aki pa asistí nan ku preparashon di nan dokumentonan pa por kompletá e proseso di solisitut.

Programa di informashon

Durante henter e mainta, bishitantenan lo por partisipá den seshonnan informativo ku representantenan di diferente organisashonnan den Ministerio di Hustisia.

E programa lo kuminsá 9:00 di mainta ku un transmishon en bibu di Tribuna Popular.

Despues di esaki lo sigui:

• 10:00 am – Seshon di informashon di Kuerpo Polisial Kòrsou.
• 11:00 am – Seshon di informashon di Kuerpo di Brantwer Kòrsou.
• 12:00 pm – Seshon di informashon di SDKK.

Durante e presentashonnan aki, partisipante nan lo risibí informashon amplio riba e trabou diario, e proseso di selekshon, e entrenamentu, oportunidatnan di kresementu profeshonal i e responsabilidatnan ku ta bin ku e diferente funshonnan.

Un mainta pa hinter famia

Aparte di duna informashon, Ministerio di Hustisia a hasi e mainta aki unu aksesibel pa hinter famia. P’esei lo tin aktividatnan pa mucha, popcorn grátis i otro fasilidatnan pa hasi e bishita agradabel pa tur persona ku pasa. Tene kuenta si, ku òp is òp.

Ku e kampaña “Mi Motibu pa Sirbi Mi Pais”, Ministerio di Hustisia ta sigui motivá mas hende, spesialmente hóbennan, pa skohé un karera den servisio públiko i kontribuí aktivamente na seguridat i desaroyo di nos pais.

No laga e oportunidat aki pasa bo “voorbij”. Bini e djasabra aki, informá bo mes i deskubrí kon bo tambe por bira parti di e organisashonnan ku ta traha tur dia pa protehá i sirbi Kòrsou.