UN PASO MAS RUMBO MIEMBRESIA DI KÒRSOU DEN WTO

Minister di Desaroyo Ekonómiko, Dr. Roderick Middelhof, ta ekspresá su satisfakshon ku e progreso ku Kòrsou ta hasi rumbo su miembresia independiente den World Trade Organization (WTO).

Djarason, 27 di mei, Promé Minister, Gilmar Pik Pisas, Minister di Finansa i Minister di Tráfiko, Transporte i Planifikashon Urbano, Minister Charles Cooper i Minister di Desaroyo Ekonómiko, Minister Roderick Middelhof, a risibí sr. Matthew Wilson, Embahador di Barbados na WTO i presidente di e grupo di trabou enkargá ku e proseso di miembresia di Kòrsou. E bishita aki ta forma parti di e esfuersonan kontinuo pa fortalesé posishon di Kòrsou den komersio internashonal.

Segun Minister Middelhof, oportunidatnan pa kresementu ekonómiko i komersio internashonal ta dependé di partisipashon aktivo den organisashonnan global manera WTO. Den WTO ta formulá e reglanan ku ta goberná komersio mundial.

Huntu ku sr. Wilson, sr. Dimitar Bratanov di sekretariado di WTO tambe ta presente na Kòrsou e siman aki pa sostené preparashon di stakeholdernan lokal. Durante e seshonnan di trabou, lo enfoká riba e pasonan nesesario pa Kòrsou por kumpli ku tur rekesitonan pa miembresia.

Minister Middelhof a enfatisá ku e proseso aki ta di gran importansia pa futuro ekonómiko di Kòrsou. “Nos meta ta pa sigui habri porta pa empresarionan lokal, atraé invershonistanan i fortalesé nos kompetitividat internashonal. Kòrsou mester sigui siendo é perla den Karibe,” asina e minister a konkluí.