Konseho di Minister ta baha ku reseso

WILLEMSTAD – Konseho di Minister a akordá pa e órgano bai ku un periodo kòrtiku di reseso. Reseso ta un periodo akordá kaminda no ta tene e reunionnan semanal di Konseho di Minister. Esaki ta brinda e ministernan e oportunidat, tempu i espasio nesesario pa enfoká riba nan propio ministerio i e trabounan ku mester atendé.

Ta bon pa enfatisá ku gobernashon di pais ta sigui normal durante e periodo di reseso aki. Den kasonan nesesario por tuma, konforme prosedura, un desishon ‘op stuk’. Esaki ta nifiká ku dokumentonan ku informashon nesesario i relevante ta pasa di kantor di un minister pa e otro, pa asina haña aprobashon di e mayoria.

E periodo di reseso no ta un temporada di vakashon, pero un mandatario por skohe (den konsulta) pa bai ku vakashon. Den un kaso asina e minister lo ta remplasá temporalmente pa e minister ku ta represent’é durante di su ousensia. E periodo di reseso ta kuminsá dia 4 di yüni, kual ta nifiká ku e último reunion planiá ta riba djárason, 3 di yüni 2026. E promé reunion despues di e reseso lo ta riba djárason, 15 di yüli 2026.

Komo ku Konseho di Minister ta bai ku reseso,  ta importante pa komunidat i tambe aparato públiko ta informá riba esaki. Den kaso di ámtenarnan, ta bon pa kada un empleado públiko ta na altura di e prosedura pa tuma desishon, tantu promé komo durante di e reseso. Di e forma akí kada ministerio por prepará adelantá di forma ku por atendé dokumentonan importante ku mester di desishon di Konseho di Minister na tempu.

Pa mas informashon tokante Konseho di Minister i e desishonnan tumá durante reunionnan semanal, por bishitá www.gobiernu.cw i klek riba ‘Desishonnan Konseho di Minister’.