Delegashon di Parlamento di Kòrsou ta partisipá na e Reunionnan Interparlamentario (IPKO) na Den Haag.

Delegashon di Parlamento di Kòrsou ta partisipá na e Reunionnan Interparlamentario (IPKO) na Den Haag.

 

Den Haag, 3 di yüni 2026, Un delegashon di Parlamento di Kòrsou a biaha pa Den Haag pa partisipá na e Reunionnan Interparlamentario, IPKO, ku ta tuma lugá 5,6 i 8 di yüni 2026. Durante e reunionnan aki, e parlamentonan di Kòrsou, Aruba, Sint Maarten i Hulanda ta topa ku otro pa interkambiá riba temanan di importansia pa e paisnan den Reino.

 

Promé ku e delegashon kuminsá ku nan partisipashon na IPKO, nan a hasi uso di e oportunidat pa optené konosementu riba tópikonan ku ta keda tratá den e komishon di Asuntunan di Reino, relashonnan interparlamentario i relashonnan eksterior i tambe durante IPKO. 

 

Awe tabatin dos bishita riba programa, di kual e promé bishita tabata na “Nuffic”, un organisashon di eksperto pa internashonalisashon den enseñansa. Durante e enkuentro, e delegashon a interkambiá ekstensamente riba e di e retonan ku studiantenan Yu di Kòrsou ta ekseprensiá, mobilidat di studiantenan, estudionan avansá na Hulanda i e konekshon ku merkado laboral. Pero tambe e problemátika di ‘brain drain’ (hóbenan ku no ta regresá despues di studia). 

 

Despues di mèrdia, e delegashon a reuní ku representantenen di e Instituto Hulandes pa Relashonnan Internashonal ‘Clingendael’. Aki nan risibí informashon tokante trainingnan i  investigashonnan ku e organisashon aki ta hasi riba e area di desaroyonan geopolítiko aktual i e posishon di seguridat stratégiko di e islanan karibense den Reino. Komo ku maneho eksterior i defensa ta asuntunan ofisial di Reino, e bishita aki a duna hèrmèntnan balioso pa na momento ku trata e punto ‘Maneho Eksterior i Defensa’, durante IPKO.

 

Reunion Tripartit riba 4 di yüni 2026 

Manera ta kustumber, promé ku IPKO, djaweps 4 di yüni 2026 lo tuma lugá e reunion Tripartit entre e delegashonnan parlamentario di Kòrsou, Aruba i Sint Maarten. E reunion aki ta enfoká riba fortifikashon di e koperashon i enterkambio di eksperensia entre e parlamentonan di e paisnan karibense i preparashon pa IPKO. Durante e reunion aki ta trata e siguiente puntonan di agènda, entre otro:

• Areglo di Disputa (Geschillenregeling): presentashon di e adaptashonnan, proponé pa e ‘Petit Comité’;
• Evaluashon di “Landspakket”: diskushon riba e rapòrt di e komishon independiente tokante e reformanan.
• Union Monetario: e funshonamentu di e Banko Sentral komun entre Kòrsou i Sint Maarten.
• Pasado di sklabitut: determiná un prosedura pa trata e tópiko aki strukturalmente den IPKO, despues di e diskushonnan resien den Nashonnan Uní.

 

Partisipashon i programa IPKO di 5, 6 i 8 di yüni 2026 

E programa ofisial di IPKO lo tuma lugá den “Tweede Kamer” i ta konsistí di e siguiente puntonan:

• 5 di yüni 2026: apertura ofisial kaminda lider di kada delegashon lo duna un diskurso inicial siguí pa un presentashon di e desaroyonan resien den e pais. Mèrdia lo tin un bishita di trabou na Haarlem pa trata e sub-tema ‘E bario komo Ekosistema’ i e impakto di behes riba kuido di ansianonan.
• 6 di yüni 2026: deliberashon riba ‘Koperashon den IPKO i den Reino’. Siguí pa deliberashon den kuater grupo di trabou (Finansa, Seguridat, Maneho Eksterior i Enseñansa) i un diálogo ku sekretario di Estado sr. Eric van der Burg.
• 8 di yüni 2026: presentashon pa e ‘Nationaal Burgerberaad Klimaat’ tokante Adaptashon di Klima i firmamentu di e lista di akuerdo, kombiná ku un konferensia di prensa ofisial.

 

E delegashon di Kòrsou ta konsistí di e siguiente miembronan:

• sr. Fergino Brownbill (Presidente di Parlamento i lider di delegashon)
• sr. David Seferina, presidente di e komishon di Asuntunan di Reino, relashonnan interparlamentario i relashonnan eksterior i miembro di Parlamento pa frakshon di MFK;
• sr. Ramon Yung, miembro di Parlamento pa frakshon di MFK;
• sr. Frenciss Lourens, miembro di Parlamento pa frakshon di MFK;
• sra. Maria Nita, miembro di Parlamento pa frakshon di MFK; 
• sra. Ruthmilda Larmonie-Cecilia, miembro di Parlamento pa frakshon di PNP;
• sr. Quincy Girigorie, miembro di Parlamento pa frakshon di PAR;
• sra. Giselle Mc William, miembro di Parlamento pa frakshon di MAN-PIN;
• kompañá pa grefir di Parlamento, sr. Silvin Cijntje

 

IPKO ta un konsulta ku ta tuma lugá dos bes pa aña, entre e parlamentonan di Aruba, Kòrsou, Sint Maarten i Hulanda. E ta ofresé un plataforma pa interkambio di informashon i deliberashon tokante temanan diverso ku ta afektá tur e paisnan di Reino, ku vista riba mihó kolaborashon.