Transishon Lovers – Kortijn
Transishon Lovers – Kortijn
E famia Kortijn a bira mas grandi, despues ku djasabra 30 di mei, den Parke Industrial na Brievengat, e trahadónan di èks Lovers por a sinti e kalor humano di e trahadónan di Kortijn, ku a yega einan i yama kada trahadó di èks Lovers bon bini na e famia Kortijn. Tabata un bunita seremonia, kargá ku hopi amor i bendishon. Palabranan di motivashon i empoderamentu di direktor Dean Rozier, ku a brinda trankilidat laboral na e trahadónan, mustrando riba plannan pa awor i futuro.
Kortijn ta un kompania establesé for di 1933, i ta sirbiendo e komunidat aki pa 93 aña kaba ku produktonan manera eis i tambe eiskrim, na gran satisfakshon di nos pueblo.
E kompania ku tabata produsí produktonan bou di e nòmber Lovers, a bati bankrut despues di un proseso lamentabel entre e doñonan/herederonan. Den un findishi ku a tuma lugá, a resultá ku e kompania Kortijn ta e mihó kandidato pa kumpra e propiedatnan di èks Lovers i asina kontinuá ku e kompania. Pa gerensia di Kortijn, e promé meta ta pa duna trankilidat na kasi 150 trahadó di Lovers ku a resultá den un insertidumbre enorme di anochi pa mainta. Ta trata di trahadónan ku a eksperensiá e situashon mas difísil ku un trahadó por pasa aden.
Kortijn bou di maneho di sr. Rozier a tuma over i mesora a pèrkurá pa mantenshon di kuponan di trabou i kontinuidat di salario di tur e trahadónan. Kortijn a kumpra e infrastruktura i a desaroyá resèptnan i hinter e tim ta sumamente orguyoso di e resultado. Teniendo kuenta ku loke tin optenibel riba merkado a invertí ainda mas pa presentá na pueblo di Kòrsou un djus di mihó kalidat. Pues a disidí ku ta bai duna mas kalidat na e produktonan dor di añadí mas fruta na kada sabor di djus. Kada hende ku purba su sabor faborito ta bai sinti ku simplemente e djusnan ta mas dushi. E djusnan ta mas natural i konsekuentemente nan ta mihó pa salú di kada un di nos.
Ta di lamentá ku e doñonan anterior ta keda krea konfushon innesesario. Kortijn ta deseá nan tur klase di éksito ku nan produktonan i ta spera ku nan ta duna e oportunidat na e 150 trahadónan ku a mantené nan kupo di trabou, pa sigui produsí produktonan di kalidat i asina gana nan pan di kada dia.
Kortijn Ice Company
48 Kortijnweg, Willemstad, Curaçao
Awor aki nos a drenta un periodo di transishon ku ta enserá ku temporalmente Kortijn lo presentá su djusnan den un empake diferente. E pakinan di djus lo ta blanku ku e nòmber Kortijn. Kada persona ku bai kumpra un dushi djus di Kortijn mester wak te ariba na e rant unda ta habri e paki;
Wak Bo sabor faborito…Te Ariba!
Esaki ta un situashon temporal, p’esei tene pasenshi un ratu i wak te ariba ora ta buska Bo Djus Faborito, ku awor a bira KORTIJN!
E mesun trahadónan, ku konosementu amplio ta keda sirbi komunidat; With the Same Love!
Management Kortijn BV
Kortijn Ice Company
48 Kortijnweg, Willemstad, Curaçao
