TOTAL SERVICES TA REGALÁ SKOLNAN BALA DI FUTBÒL
TOTAL SERVICES TA REGALÁ SKOLNAN BALA DI FUTBÒL
WILLEMSTAD– Pa enfatisá su entusiasmo ku e partisipashon di selekshon di Kòrsou den Kopa Mundial 2026, Total Services a lansá ‘Bala tra’i Bala’, un Blue Wave kampaña pa tur hende na Kòrsou. Ku ‘Bala tra’i Bala’ henter komunidat por gana bala di futbòl pa e skol básiko di nan yunan, djis dor di partisipá.
“Bala tra’i Bala ta forma parti di nos kompromiso kontinuo pa invertí den nos komunidat”, asina Bettina Vermaas, direktora di Total Services ta bisa. “Nos kier duna bek na nos komunidat. E mihó manera ku nos ta mira pa hasi esaki ta dor di invertí den nos muchanan ku ta nos futuro.”
Simpel
E konsepto di e kampaña ta simpel: kada be ku selekshon di Kòrsou hunga un partido ofisial den Mundial, Total Services ta regalá 10 bala di futbòl na un skol di fundeshi na Kòrsou. Promé ku entregá e balanan, ekipo di Total Services lo hasi un limpiesa kompleto di e tereno di futbòl di e skol ganador.
“Nos ke stimulá moveshon, un bida salú i siña traha huntu komo ekipo bou di mucha”, asina señora Vermaas ta bisa. “Pa nos ta importante tambe ku deporte tuma lugá den un ambiente limpi. Pesei nos ta hasi e limpiesa di e tereno.” E skolnan ganador lo wordu anunsiá mesora despues di kada partido. Debí na e fakansi di skol, limpiesa di e tereno i entrega di e balanan lo tuma lugá na prinsipio di e aña eskolar nobo.
Partisipashon
E kampaña ta tuma lugá riba e plataformanan di Facebook i Instagram di Total Services. Promé ku kada partido di Kòrsou, lo publiká un post spesial. Pa partisipá tin ku pronostiká e resultado di e partido. Ademas tin ku menshoná e nomber di e skol básiko di e yu i invitá tur hende pa like nan reakshon. E persona ku rei e resultado korekto i haña e kantidat mas grandi di likes ta gana. Lo tin chèns di gana kada be ku selekshon di Kòrsou hunga un wega.
Si ningun hende pronistiká e resultado korektamente, e skol ku a risibí mas apoyo den forma di likes ta gana. Si diferente hende rei e resultado i tin mesun tantu likes, un sistema obhetivo digital ta determiná e ganador.
“Meskos ku tur hende nos ta spera ku Kòrsou lo keda den kontienda te na e último match”, señora Vermaas ta bisa. “Dj’e manera ei no solamente nos por briya komo pais riba e plataforma internashonal di futbòl, pero tambe nos lo por otorgá bala tra’i bala na un kantidat máksimo di skol.” Señora Vermaas ta enfatisá ku e kampaña ta enfoká riba skolnan básiko, i ku kada skol por gana un be so. Ademas kada partido ta forma un kompetensia riba su mes. “Un chèns nobo pa mas skolnan gana.”
Tokante Total Services
Total Services ta e empresa mas grandi di limpiesa na Kòrsou ku ta sirbiendo sektor públiko i privá pa kasi 30 aña. Ku rònt 600 empleado i servisionan sertifiká internashonalmente, e empresa ta komprometí no solamente ku kalidat, sino tambe ku desaroyo di komunidat.
Pa sigui i partisipá den e kampaña ‘Bala tra’i Bala’, bishitá e página ofisial di Total Services riba Facebook òf Instagram.
