Minister di Aruba Mervin Wyatt Ras Gobierno ta informa encuanto espacio cu ta prepara medicamento na Horacio Oduber Hospital

Dialuna Horacio Oduber Hospital su espacio pa prepara cierto medicamento a mustra cierto danjo dor di cual no tabata posibel pa prepara e medicamento.

De inmediato den cooperacion entre hospital y gobierno a logra pa medicamentonan cu ta ser prepara den e espacio aki lo por ser prepara na un Botica local y un otro parti a busca sosten di CMC Corsou. E medicamentonan cu lo ser prepara na Corsou lo ser transporta pa Aruba cu cooperacion di Douane di Aruba y Corsou, tambe Inspectie Volksgezondheid.

E espacio cu a sufri danjo no por ser usa mas, sin embargo tin un espacio nobo cu lo mester ser entrega entrante augustus di e anja aki.

Esaki ta un di espacionan cu tin cu ser transpasa den e proceso di finalisacion di renobacion y ampliacon di e edificio di Hospital cu a inicia desde 2013. Gobiernonan no a finalisa esaki.

E Minister actual encarga cu Salubridad publico, Asunto Social, Cuido di Adulto Mayor y Maneho di Adiccion, desde cu gobierno a huramenta, ta na mesa di dialogo cu Hospital y SOGA pa yega na traspaso di e espacionan.

A habri e entrada principal y a finalisa diferente parti di hospital. A firma un timeline pa e proceso continua y den esaki tin intencion pa e espacio nobo pa prepara medicamento ser finalisa y entrega na augustus di e anja aki.

Mientrastanto a busca un solucion den deliberacion entre Horacio Oduber Hospital y CMC di Corsou. Pueblo por ta trankil cu a busca un solucion.

Ta di importancia pa cuido medico di Calidad por ser salvaguardia. Esey ta compromiso cu nos gobierno tin cu Pueblo di Aruba.