Kòrsou su yunan ta sigui destaká den tur skina:  Swordfish Aquatic Group ta trese diferente medaya for di kompetensia di natashon sinkronisá na Panama. 

Kòrsou su yunan ta sigui destaká den tur skina: 

Swordfish Aquatic Group ta trese diferente medaya for di kompetensia di natashon sinkronisá na Panama. 

Willemstad- Dianan 10 te ku 15 di yüni último, ocho atleta di e ekipo Swordfish Aquatic Group a biaha pa partisipá den kompetensia PanaCur 2026 na siudat di Panama. Ta trata aki di un kompetensia di natashon sinkronisá (waterballet) ku a tuma lugá entre atletanan for di diferente pais den region; tantu riba nivel prinsipiante komo intermedio. Durante e kompetensia PanaCur, nos atletanan lokal a sa di trese medaya den tur kategoria di e kompetensia, sakando kara di nos pais grandemente den e deporte di natashon sinkronisá tambe. 

Riba djabièrnè, 12 di yüni a tuma lugá kompetensianan di figura den e diferente kategorianan. Durante kompetensia di figura, kada atleta individualmente mester por apliká 4 diferente figura predeterminá di natashon sinkronisá den su kategoria. Un pènel di hurado ta evaluá ehekushon di kada atleta riba entre otro eksaktitut, kontrol di moveshon i aplikashon di téknika. Kompetensia di figura, ta forma e fundeshi di e deporte di natashon sinkronisá. Den e kompetensia di figura, atleta di Swordfish Nia Rose Plaate a gana dos medaya di oro pa kompetensia den tantu kategoria ‘Semillitas’ pa muchanan di 10 aña i ménos i tambe kategoria Mini A, Eliana Kuwas a trese kas medaya di oro den kategoria ‘Semillitas’ 11 & 12 aña. Den kategoria Mini B, Jay-D’Laynah Rijke a gana medaya di bròns i Maria Fernanda Orejuela Osorio a trese e medaya di oro kas. Atleta Zyva Mongen tambe a gana medaya di oro den kategoria Hubenil Prinsipiante miéntras Nisheely Obispo a trese kas e medaya di plata den kategoria Hubenil Intermedio i Alysha Silié a gana medaya di oro den e kategoria akí. 

Aparte di kompetensianan di figura tabatin tambe kompetensia di rutina riba djasabra 13 di yüni; tantu rutina solo, duet komo rutina den grupo. Durante kompetensia di rutina e atleta ta presentá un koreografia den awa ku músika. Rutinanan ta keda huzgá a base di entre otro ehekushon, impreshon artístiko di e atleta i difikultat di su rutina. Den e kategoria aki tambe Swordfish a destaká inmensamente na PanaCur 2026. Den kompetensia di duet, Swordfish tabatin un presentashon den kategoria Mini B (Maria Fernanda i Jay- D’Laynah) i un duet den kategoria Hubenil Intermedio (Nisheely i Alysha), ámbos duet a bini kas ku medayanan di oro. Den rutina solo kategoria ‘Semillitas’ 11 i 12 aña, Eliana tambe a gana otro medaya di oro. Pa loke ta trata kategoria Mini B, Jay-D’Laynah a gana medaya di bròns pa su rutina solo i Maria Fernanda a trese kas e medaya di plata. Den kategoria Hubenil Prinsipiante, Zyva a bolbe trese kas un medaya di oro mas. Den kategoria Hubenil Intermedio, Alysha a gana medaya di bròns pa su solo i Nisheely a kapturá otro medaya di oro. Swordfish su úniko rutina di tim pa e kompetensia akí tabata ku e 4 atletanan di Mini A i B, esta Nia Rose, Jay- D’Laynah, Leilani Cannegieter i Maria Fernanda. Pa e rutina akí, nos atletanan a trese kas e medaya di bròns. 

Un total di 17 medaya; 11 oro, 2 plata i 4 bròns. Esaki ta mustra un biaha mas, ku Kòrsou ta kargá ku potensial i atletanan ku ta bria den tur skina. Pabien na henter ekipo si Swordfish i pabien na Kòrsou ku e bunita logro akí. Ban sigui invertí den nos hóbennan pa nan por keda saka kara di nos pais.