DVG ta anuncia cu entusiasmo e 12 ganadonan di e Competencia di Arte Escolar “Doño Responsabel”
DVG ta anuncia cu entusiasmo e 12 ganadonan di e Competencia di Arte Escolar “Doño Responsabel”
ORANJESTAD, Aruba, 16 di oktober 2026: Directie Volksgezondheid (DVG) ta sumamente contento y orguyoso di anuncia e 12 ganadoranan di e Competencia di Arte Escolar “Doño Responsabel”. E competencia aki a resulta den un participacion fantastico di 725 pintura, crea pa alumnonan di 17 diferente scol basico na Aruba!
E competencia, anuncia dia 31 di augustus pa Minister di Salud hunto cu Minister di Enseñansa y oficialmente lansa pa DVG dia 1 di september, tabatin como meta conscientisa muchanan for di edad tempran tocante e importancia di cuido y responsabilidad pa nos mascotanan.
Cu hopi creatividad, color y imaginacion, e muchanan a ilustra con un doño responsabel mester cuida su cacho y/of pushi, dunando nan cuminda, awa, proteccion, atencion veterinario y, mas importante ainda, amor durante henter nan bida.
DVG ta felicita e 12 ganadornan di e competencia:
Alessa Semeleer, Princes Amalia Basisschool, 4e klas
Anne-Mary Pereira, Maria Goretti College, 5e klas
Jaiden Mathias Ayala Sigcha, Colegio Hilario Angela, 2e klas
Jayda Heidweiller, Mon Plaisir School San Nicolas, 1e klas
Jeremiah Jacobs, Colegio San Hose, 2e klas
Jobriel Lacle, Maria Goretti College, 6e klas
Juan Vicente Rodriguez Quintero, St. Franciscus College, 1e klas
Liana Geerman, Colegio San Hose, 6e klas
Mayaleah Rodriguez, Colegio Bon Bini, 3e klas
Nathalia Becerra Pabon, Colegio Frere Bonifacius, 3e klas
Scarlys Diaz Sanchez, Princes Amalia Basisschool, 4e klas
Sofia Buunen, Princes Amalia Basisschool, 5e klas
DVG kier expresa un agradecimento special na e tres scolnan cu e participacion mas grandi:
- Colegio San Hose, 103 pintura
- Colegio Hilario Angela, 79 pintura
- Mon Plaisir School San Nicolas, 75 pintura
Un danki di curason na tur e 17 scolnan, directornan, maestronan, mayornan y especialmente nos muchanan pa nan entusiasmo, dedicacion y creatividad. Boso participacion a haci e competencia aki un gran exito!
Un entrega special y un sorpresa grandi!
Diabierna 23 di oktober 2026, pa 2:00 di merdia, e 12 ganadoranan lo ricibi nan regalo durante un ceremonia special na Bestuurskantoor.
Durante e ceremonia aki DVG lo anuncia tambe e ganador absoluto, kende su pintura lo wordo transforma den un mural riba e futuro Centro di Rescate y Control. Di e manera aki, e obra di arte lo keda como un simbolo duradero di amor, cuido y responsabilidad pa nos animalnan.
Pa DVG, e berdadero exito di e competencia aki ta bay mas leu cu e 12 premionan. Ta e oportunidad pa sembra den nos muchanan e comprension cu un mascota no ta un obheto, sino un ser bibo cu ta merece cuido, proteccion y amor durante henter su bida.
Nos ta spera cu e 725 pintura aki ta representa 725 oportunidad pa inspira famianan y e comunidad pa preveni abandono y maltrato di animalnan na Aruba.
Sea bo tambe un doño di mascota responsabel. Cada acto di responsabilidad ta salba bida.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw
