Zona di Desperdicio ta registra resultado positivo den prome tres siman
Zona di Desperdicio ta registra resultado positivo den prome tres siman
ORANJESTAD — E Zona di Desperdicio permanente na Barcadera ta continua mustra resultado positivo desde su apertura oficial, ofreciendo comunidad un manera mas accesibel, conveniente y responsabel pa deshaci di sushi.
Den e prome tres siman di operacion, un total di 2,472 vehiculo a haci uzo di e facilidad. Durante e mes periodo, a recoge 376 baki di sushi, ekivalente na 487 ton di material.
Minister di Turismo, Transport y Labor, mr. Wendrick Cicilia, a expresa satisfaccion cu e participacion activo di comunidad y a enfatisa cu e cifranan ta confirma e necesidad di un solucion permanente pa maneho di sushi na Aruba.
“E resultado aki ta mustra cu comunidad ta aprecia e facilidad y ta haci uzo di dje. Hunto nos por sigui mantene Aruba limpi y crea un entorno mas agradabel pa biba, traha y bishita,” Minister Cicilia a expresa.
Gobierno ta invita tur ciudadano cu tin bulky waste, sushi di hardin of otro tipo di sushi permiti, pa haci uzo di e servicio. Zona di Desperdicio ta completamente gratis y ta habri di dialuna te cu diasabra, for di 7:00 di mainta te 3:00 di atardi, ofreciendo mas flexibilidad pa comunidad deshaci di nan sushi den un forma responsabel.
Door di haci uzo di e facilidad, cada ciudadano ta contribui directamente na un Aruba mas limpi, mas organisa y mas sostenibel p’e futuro generacionnan.
