Tur dia, un team dedica di profesionalnan ta traha den diferente barionan di Aruba pa proteha nos comunidad.
GKMB ta encarga cu control y maneho di sanguranan na Aruba. Nan trabou ta contribui directamente na prevencion di malesanan manera Dengue, Chikungunya, Zika y Keintura Geel, cu por wordo transmiti door di e sangura Aedes Aegypti.

Pa logra esaki, personal di GKMB ta realisa inspeccion den barionan, identifica y elimina posibel criaderonan di sangura, brinda informacion y conseho na comunidad y tuma accionnan preventivo pa reduci e cantidad di sangura rond di casnan y negoshinan.

Hopi biaha comunidad ta mira personal di GKMB canando den bario of bishitando casnan, pero no tur hende sa exactamente kico nan funcion ta. E bishitanan aki ta un parti esencial di e trabou preventivo cu ta yuda mantene Aruba mas sigur y liber di malesa transmiti pa sangura.

Personal di GKMB semper ta facilmente reconocibel. Nan ta bisti cu polo shirt color creme cu logo oficial di DVG y ta carga identificacion oficial durante nan trabou.

DVG ta anima comunidad pa conoce e equipo di GKMB. Den e siguiente simannan lo tin mas informacion riba e trabou intensivo di e team di GKMB riba Facebook di Directie Volksgezondheid DVG Aruba. Prevencion di malesanan transmiti pa sangura mester ta un esfuerszo comparti entre Gobierno y cada ciudadano pa por beneficia henter comunidad.

Atraves di nan labor diario GKMB ta sigui traha pa proteha Aruba. Conoce GKMB pa hunto nos proteha bo famia y Aruba completo

Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw.