Parlamento di Kòrsou Resúmen di aktividatnan na i rondó di tres wega Kòrsou kontra Kosta di Marfil. Philadelphia, Pennsylvania.

Philadelphia, Pennsylvania.

Pa e delaster wega di grupo di nos selekshon nashonal di futbòl, tambe Presidente di Parlamento, sr. Fergino Brownbill, tabata presente. E wega aki igual tabata impreshonante i den mesun rosea otro fo’i e weganan anterior. E loke a hasi e wega tres diferente tabata entre otro ku e Presidente di Fédération Internationale de Football Association (FIFA), sr. Gianni Infantino, a asistí na hinter e wega aki kompañando tantu nos promé Minister i e delegashon di Kòrsou, komo e kabes di estado i delegashon di Kosta di Marfil. Tur e representantenan dje respektivo paisnan a sinta den mesun sekshon. No opstante ku nos no a logra e viktoria i pasa pa e siguiente buèlta, Parlamento di Kòrsou ta ekspresá su gratitut i apresio pa kada un di e miembronan ku ta forma e tim di e selekshon di futbòl Kòrsou. Un danki di kurason pa hisa nos pais pone un kaminda asina haltu den mundu, ku pa historia ta keda grabá. Danki pa toka kurason di asina tantu merikano i otro ekstranhero ku banda di nan pais, tabata bisti Kòrsou su jersey bai stadion i apoyá nos selekshon. Tambe nos ke yama danki na Minister di deporte di Bermuda, kende a bula bai Philadelphia huntu ku su delegashon pa asistí i sostené Kòrsou. Asina tin hopi mas ehèmpel i eksperensia ku komo representante dje órgano demokrátiko mas haltu di nos pais, ta yena bo ku satisfakshon enorme, mirando ku algu asina aki nos no a yega di biba den nos historia. Ta un emoshon ineksplikabel i Presidente di Parlamento ta gradesido di por a representá i duna kara apoyando nos selekshon na nòmber dje siudadanonan di Kòrsou.

Banda di e wega Presidente di Parlamento, sr. Brownbill tabatin algun otro enkuentro interesante. Asina sr. Fergino Brownbill huntu ku Promé Minister, sr. Gilmar Pisas, a asistí na un resepshon diplomátiko organisá pa e “Commonwealth of Pennsylvania”. Promé ku e resepshon e “Governor”, sr. Josh Shapiro i “Lieutenant Governor”, sr. Austin Davis a reuní ku Promé Minister, sr. Pisas i Presidente di Parlamento, sr. Fergino Brownbill. Tabata un kombersashon ekstenso pa entre otro felisitá Kòrsou ku e logro, sera konosí i papia riba tur posibilidatnan ku Kòrsou ta ofresé na e momentunan aki.

Siguiendo ku e resepshon ku a konta ku mas di 30 diplomátiko i komersiante, nos Promé Minister a duna un spich elokuente, pa despues interkambiá ku tur esnan presente.

Un otro enkuentro importante di Presidente di Parlamento tabata ku e representante di Gobièrnu di Kòrsou na Washington, sr. Jérôme Beeldsnijder. Resien sr. Beeldsnijder a keda nombrá pa representá Kòrsou su interesnan na Washington i ya den korto tempu e la hañ’é enkargá pa yuda organisá e bishita di e diferente mandatarionan di Kòrsou na e weganan di Kopa Mundial na Merka.

Durante e kombersashon sr. Beeldsnijder a duna un bista di su eksperensianan hasiendo e trabou te ku awor. Tambe loke nan e ta mira komo reto i di otro banda posibilidatnan pa Kòrsou ets. Na e momentunan aki nos representante ta kompartí ofisina i traha huntu ku embahada di Reino Ulandes. Presidente di Parlamento a ofresé pa duna sosten kaminda ta nesesario i kaminda e mes ta mira ku mester.