Konmemorashon 85 aña demokrasia parlamentario na Kòrsou.

Djárason 5 di aprel 2023, Parlamento di Kòrsou a para ketu na e echo ku 85 aña pasá a start un proseso ku a hiba na e demokrasia parlamentario ku nos konosé awe. P’esei Parlamento a tene un reunion solèm na e okashon aki, ku a keda presidí dor di Presidente di Parlamento sra. Charetti America-Francisca.

 

Durante e reunion solèm Presidente di Parlamento, sra. Charetti America-Francisca a hiba su diskurso splikando e proseso ku a hiba te na e demokrasia parlamentario ku nos konosé awe.

Despues di e diskurso di Presidente di Parlamento, kada lider di Frakshon a duna nan disertashon.

 

Na e okashon aki a invitá èks-Presidentenan di Parlamento di Antia i Parlamento di Kòrsou. E reunion a keda presensiá pa èks-presidentenan sr. Roy Markes, sr. Dudley Lucia, sr. Pedro Atacho, sr. Jean Francisca i sr. Humphrey Davelaar.

 

Den kuadro di 85 aña demokrasia parlamentario na Kòrsou, Parlamento di Kòrsou lo organisá diferente aktividat den e aña ku ta sigui pa informá i konsientisá komunidat tokante di nos demokrasia parlamentario i funshonamentu di Parlamento di  Kòrsou. Keda pendiente.

 

Por wak e reunion solèm bèk, via: https://channel.royalcast.com/curacao/#!/archived