KUERPO POLISIAL KÒRSOU 

KOMUNIKADO DI PRENSA

199/2026 

1 yüli 2026 

Kontròl riba impuesto di vehíkulo di motor 

Entrante di djárason 15 di yüli 2026, polis lo kuminsá ku kontròlnan dirigí riba  impuesto pa vehíkulo di motor pa aña 2026. 

Doñonan di vehíkulo di motor ku ta hasi uso di kaminda públiko, entrante di e  fecha ariba menshoná mester tin impuesto di nan vehíkulo pagá te ku 31 di  desèmber 2026. 

Ademas e vehíkulo mester ta disponé di dos plachi di number nobo, pegá tantu na e parti dilanti komo e parti patras di e vehíkulo. 

Pa bròmer ta sufisiente si e plachi ta pega parti patras so di e vehíkulo.  Ora ta trata di kombinashon di vehíkulo (trailer of ‘aanhangwagen’), e plachi di  number mester ta pegá na e parti dilanti di e vehíkulo ku ta hala i na e parti  patras di e vehíkulo ku ta wòrdu di halá. 

Ta prohibí pa pone plachi di number patras di, riba di òf na winshil di e  vehíkulo. E prohibishon aki ta konta tambe pa bùs i vehíkulo di karga. 

No ta permití entrante di e fecha ei pa ta riba kaminda públiko mas ku e  plachinan di number bieu ni tampoko plachinan di number, ku no ta esun  original ku Ofisina di Impuesto ta otorgá. 

Ta estriktamente prohibí pa remplasa e plachinan di number original ku  Ofisina di Impuesto ta otorgá pa plachinan di number imitá òf falsifiká. E plachinan di number aki lo wòrdu konfiská dor di polis i lo duna un prosès  verbal na e shofùr di e vehíkulo.

E plachinan di number mester ta visibel. Pues no por pone opheto i/o adorno  na e plachi di number ku ta minimalisá e visibilidat òf deformá e plachi òf ku ta  blèndu otro usuarionan di kaya. Tampoko por pone e plachi di number na un  lugá na e parti dilanti òf patras di e vehíkulo, ku ta hasi difísil pa mira e plachi  òf lesa e number ku tin riba esaki. 

Den skuridat e plachi di number parti patras di e vehíkulo mester ta bon  iluminá i e lus di e plachi di number patras mester sende pareu ku e otro  lusnan di e vehíkulo. 

Den kaso ku e plachi di number ta na e parti patras di e ‘aanhangwagen’, esaki  tambe mester ta iluminá. 

Huntu ku e karchi di impuesto, e shofùr/doño mester tin un steker di kontròl  tambe, ku e por mustra outoridat na momentu ku esei wòrdu pidí di dje. 

Pa evitá situashonnan desagradabel kaminda ku polis lo mester aktua di forma  represivo dor di parti but of asta kita e vehíkulo, polis ke hasi un yamada na  tur doño di vehíkulonan di motor, pa sòru pa dokumentunan di e vehíkulonan  aki ta debidamente na òrdu promé ku nan subi kaya.