DAO ta recorda tur empresa riba nan obligacion legal a base di e Ordenansa Laboral 2013 (Arbeidsverordening 2013) pa entrega nan Registro di Personal y Necesidad di Personal. Cuminsando na 2026, entregamento di e documentonan aki lo tuma luga exclusivamente via e portal digital LABORA.

Na comienso di luna di februari, DAO a publica den medionan di comunicacion un relato extenso informando riba e proceso di entrega di e Registro di Personal 2025 y Necesidad di Personal 2026. E comunicado aki ta pa informa cu DAO ta dunando un extension di e fecha pa entrega di e documentonan aki. E fecha nobo ta bira 30 di augustus 2026. Ultimo simannan no tabata posibel pa DAO por a procesa tur e peticionnan pa acceso pa su databank. Y pa es motibo aki ta pone un extension pa entrega di e documentonan.

EXTENSION DI FECHA

Originalmente, e periodo stipula pa entrega y actualisa e datonan di bo empleadonan y e necesidad di personal tabata te cu 30 di juni 2026. DAO ta duna extension pa entrega di e Registro di Personal te cu 30 di augustus 2026. Si tin acceso caba na e portal digital LABORA, mester actualisa e informacion di e empleadonan.

Tene na cuenta cu DAO ta controla pa incumplimento di nos leynan laboral. E empresanan cu no cumpli of cu entrega informacion incorecto of incompleto ta risca un sancion administrativo di te cu un maximo di Afl. 5.000,-. Tambe tuma nota cu si ta haci uzo di un intermediario, manera un oficina di administracion, e obligacion legal ta keda riba e dunado di trabou y no riba e intermediario.

Acceso y entrega via e portal LABORA

Tur empresa mester tin acceso na LABORA. Si bo empresa no tin acceso ainda, mester pidi esaki lo mas pronto posibel mandando un e-mail na: aanvraagpr@gmail.com, simon.brete@aruba.gov.aw of louisetty.croes@aruba.gov.aw. Tambe por descarga e formularionan y instruccionnan necesario pa e peticion pa haya acceso via nos website (www.daoaruba.com).

Dato nobo of por haci cambio via e portal na tres manera:

1. Via e formularionan standard cu ta disponibel den e menu di e portal; of
2. Door di subi un archivo (bestand) Excel pa prome biaha; of
3. Door di subi un archivo (bestand) Excel pa haci cambio (mutacion) den dato di empleadonan.

Formularionan standard

E formularionan standard ta mas apropia pa haci cambionan chikito den dato di empleadonan, manera nomber di funcion, salario, dianan di trabou of oranan di trabou y pa cambionan cu ta regarda menos cu dies (10) empleado. Pa cada empleado mester yena un formulario separa.

Manda e dato di empleadonan pa prome biaha (Prome upload)

Ora bo ta manda e dato di empleadonan pa prome biaha na DAO, mester uza e archivo Excel (Migratie – Eerste upload werknemersgegevens).

Cambio den e datonan di trahado

Si tin varios cambio, bo por uza e archivo Excel (Wijzigingen werknemersgegevens).

E formatonan di e archivonan Excel y instruccionnan adicional ta disponibel:

• Personeelsregister 2025 (Registro di Personal 2025)
• Toelichting Personeelsregister 2025 
• Personeelsbehoefte 2026 (Necesidad di Personal 2026)
• Toelichting Personeelsbehoefte 2026

Pregunta of ayudo?

Pa preguntanan tocante e Registro di Personal of temanan relaciona cu esaki, por tuma contacto cu: 

• Sra. Louisetty Croes: via telefon 523 7722 of e-mail louisetty.croes@aruba.gov.aw
• Sr. Simon (Oscar) Brete: via telefon 523 7718 of e-mail simon.brete@aruba.gov.aw
• Bureau Arbeidsmarktonderzoek: via telefon 523 7720