‘Paralel’ ta parti di Interlasado cu alabes ta un di e diferente practicanan artistico cu Ramos ta ehecuta den su arte, por ehempel: performance, video art, ceramica di autor, printmaking, pintura, arte di cuminda y traha cine.

Den e exposicion aki, curated pa Irvin Aguilar, lo por mira diferente obra realisa cu klei mane ceramicanan di autor, pintura y proyeccion di video.

INTERLASADO: PARALEL ta invita publico drenta den e imaginario di Velvet caminda nos por topa cu elementonan inspira dor di naturalesa, simianan y nos hende muhe alabes cu nos lo por admira e ofishi di traha cu klei. Door di colonialismo nos a degrada esaki mane un arte inferior pero Ramos lo desea pa pone den e mesun nivel y balansa cu e otro fine arts cu ta considera mas “eleva” of “sagrado”.

Publico ta keda cordialmente invita pa e apertura oficial dia 9 di juli 2026, 6:30 di atardi na Biblioteca Nacional Aruba (George Madurostrast 13, Oranjestad)

E exposicion lo keda habri pa publico for di 10 di juli te cu 31 di juli 2026.

Tocante e artista

Velvet Zoé Ramos (b.1988, Tulsa OK,USA) ta un artista visual interdisiplinario bibando y trahando na Aruba. Su trabou ta enfoca riba con nos ta relaciona ku otro y nos mes door di explora mecanismonan humano manera empatia, memoria y construccionan di narativo. Ramos ta uza un rango amplio di tecnica, for di grabacion te na obranan di video. E ta toca temanan manera desbalance social y economico, representacion di mobilidad humano (migracion) y nostalgia.

Ramos a gradua na 2011 cu un BA Honors den Fine Arts na Central Saint Martins, London UK. Ramos a participa na varios exposicion y tambe proyectonan specifico pa e sitio y pa comunidad. El’a representa Aruba den un show di grupo na Mykonos Biennale 2021 y a select’e pa e di 19 Asian Biennale, Bangladesh na 2022.