Redukshon di supsidio di kas di ansiano Nos Welita ku 25% (Cg 403.958) 

Presidente di Parlamento di Kòrsou 

Sr. F. Brownbill 

Wilhelminaplein 4 

3 yuli 2026 

Apresiabel sr. Brownbill, 

Pa medio di e karta aki mi ta pidi bo pa dirigí e karta athunto na Minister di Desaroyo 

Sosial, Labor i Bienestar, sra. Charetty America-Fransisca. 

Danki pa e koperashon. 

Atentamente, 

Mr.drs. Javier Silvania, 

Parlamentario pa 

frakshon di MFK 

2026 

Frakshon di MFK 

MOVEMENTU FUTURO KÒRSOU 

Minister di Desaroyo Sosial, Labor i Bienestar, 

Sra. Charetti America-Francisca 

Willemstad, 3 yuli 2026 

Tópiko: Redukshon di supsidio di kas di ansiano Nos Welita ku 25% (Cg 403.958) 

Apresiabel sra. America-Francisca, 

Suskrito, miembro di frakshon di Movementu Futuro Kòrsou den Parlamento di Kòrsou, mr.drs. Javier Silvania, ta pidi bo atenshon pa lo siguiente. 

Suskrito komo eks Minister SOAW i GMN a bishita durante su mandato diferente kas di ansiano na Kòrsou. Último añanan SOAW a kòrta den e supsidio ku ta duna kasnan di ansiano. E konsekuensia ta ku e kalidat di kuido na nos grandinan a bai hopi atras. Nos a konstatá edifisio ku ta falta mantenshon. Dak ku ta lèk i hasta a bin abou ora awa kai. Schimmels na muraya, kama opsoleto, ròlstul kibra, matras sushi, enfermera mal paga ku ta gana salario mínimo, kuminda di kalidat inferior, raton, muskita i otro insekto den kas di ansiano. Hasta Aqualectra a yega di kòrta awa i koriente na kas di ansiano. Silvania a drecha finansa públiko i a sòru pa gobièrnu den 2022, 2023 i 2024 tin surplus riba presupuesto. Ku otro palabra Silvania a sòru pa gobièrnu tin sèn i e sèn mester bai pa drecha kalidat di bida di nos grandinan. Ta p’esei Konseho di Minister riba petishon di Silvania komo minister SOAW a bai di akuerdo ku gobièrnu no ta kòrta mas den e supsidio pa kasnan di ansiano manera Fundashon Kuido Integral Banda Bou, Stichting Huize Zorg en Hoop, Fundashon Kas di Ansiano Nos Welita, Stichting voor ouderenzorg Birgen di Rosario. Tambe SOAW no ta kòrta mas den presupuesto di internat manera Fundashon Guia, Eduka i Forma (GEF). 

Na 2025 e siguiente montante a wòrdu paga na supsidio konforme e ‘wensbegroting’ ku e fundashon a entrega na SOAW: 

Fundashon Guia Eduka i Forma (GEF) 

4.675.650 

Stichting New Creation Curaçao (jeugdopvang) 

414.405 

Stichting Huize Zorg en Hoop 

660.000 

Stichting Thuiszorg Banda ‘Bou 

981.218 

Fundashon Kuido Integral Banda ‘Bou 

1.710.129 

Stichting voor Ouderenzorg Bírgen di Rosario 

9.544.322 

Fundashon Kas di Ansiano Nos Welita 

1.615.831 

Stichting Maatschappelijke Zorg en Herstel 

1.700.000 

Fundashon Sentro Pa Guia Edukashonal (SIGE) 

430.296 

Gobernashon ta kontinuashon. Konsiderando tur esaki, Silvania, hasiendo uso di artikulo 96 di Reglamentu di Òrdu di Parlamento, ta hasi e siguiente preguntanan: 

1. Minister America tin intenshon di kontinuá ku e maneho di ex minister Silvania òf ta bai sigui kòrta manera a sosodé den pasado den e supsidio di kasnan di kuido i internat? 
2. Minister America por manda e dekreto ministerial 2025 i 2026 pa supsidio di e 9 

fundashonnan ariba menshoná? 

3. Ki dia minister ta bai kumpli ku art. 31 di Landsbesluit Subsidie i publiká den korant ta kua fundashon den 2025 i 2026 a haña supsidio i e montante korespondiente? 

Supsidio 2025 

Na aña 2025 kas di ansiano Nos Welita a haña Cg1.615.831 na supsidio. Silvania mester a baha komo minister SOAW i no por a firma e dekreto ministerial pa Nos Welita na yanüari 2025. Ta usual ku minister SOAW ta firma pa mas tarda den yanüari di kada aña e dekreto ministerial. Den e dekreto ministerial ta pone kuantu sèn e fundashon ta haña di supsidio pa e aña ei. Tur luna SOAW ta paga 1/12 parti (Cg 134.652) di e montante aprobá. Tambe minister SOAW ta pone den e dekreto ministerial e kondishonnan ku e fundashon mester kumpli kuné. 

Dia 7 oktober 2025 sra America komo minister SOAW a firma e dekreto ministerial ku 

gerensia di Nos Welita a risibí un luna despues. Nos Welita a haña Cg 1.615.831 manera konseho di minister a aprobá. Den artikulo 1 di e dekreto ministerial minister America a 

pone e siguiente kondishonnan. Nos Welita mester tuma un ‘verpleegkundige’ i un direktor ku diploma di bachelor den servisio. Silvania ta aploudí e desishon di minister ku Nos Welita mester tin personal altamente kualifiká pa kuida nos grandinan. Di otro banda pa por kumpli ku minister su eksigensia SOAW mester duna Nos Welita sufisiente sèn pa por paga e profeshonalnan aki. 

Nos Welita ta kuida 35 ansiano i tin 25 trahadó. Minister America a duna Nos Welita Cg 81.928 pa aña pa paga un direktor i Cg 65.718 pa aña pa paga un enfermera. Despues di kita loonbelasting i prima di seguro sosial e direktor ta risibí nèto Cg 5.476 pa luna i e enfermera ta risibí nèto Cg4.401 pa luna. E montante ariba menshoná ta inkluí overtaim, vakantiegeld, dark hours, bónus etc. En komparashon. Minister ta gana alrededor Cg 12.000 nèto. Parlamentario Cg 9.000 nèto. 

Pregunta: 

4. Minister America ta kere ku e montante ku minister a duna Nos Welita na supsidio pa paga salario di enfermera i direktor ta sufisiente pa atraé un profeshonal altamente kualifiká? 

Tambeminister America a pone komo kondishon ku mester restrukturá e direktiva di Nos Welita. Si pa 31 desèmber 2025 Nos Welita no kumpli ku e kondishonnan ariba menshoná minister America ta baha e supsidio ku 25%, esta Cg 403.958. 

Bezwaar 

Konforme art. 56, insiso 1 di Landsverordening Administratieve Rechtspraak (LAR) Nos 

Welita a bai den bezwaar serka minister SOAW. Nos Welita a manda un karta fecha 8 

yanüari 2026. Nos Welita ta konsiderá ku fo’i 2024 nan a kumpli ku e eksigensianan ku minister America a pone den e dekreto ministerial fecha 7 òktober 2025. Nos Welita ta referí minister America na e jaarverslag 2024 ku SOAW tin den su poder. 

Den e karta Nos Welita ta puntra minister America kiko presis e kier men ku restrukturá e bestür di Nos Welita. E eksigensia di minister America no ta ‘duidelijk’ pa Nos Welita. Konforme art. 69, insiso 1 LAR minister mester kontesta dentro di 4 luna por eskrito e karta di opheshon di Nos Welita. Segun bestür di Nos Welita te dia di awe minister America no a kontesta nan karta di opheshon. 

Supsidio 2026 

Supsidio ta wòrdu duna pa aña. Di yanüari pa desèmber. Tur aña Nos Welita mester hasi petishon pa supsidio di nobo. Nos Welita a haña e dekreto ministerial pa supsidio 2026 fecha 25 mart 2026. Nos Welita ta haña Cg1.211.873 pa aña. Den 2026 minister America a kòrta den e supsidio di Nos Welita ku 25%. 

Minister a kòrta den e supsidio ku Cg 403.958 (Cg1.615.831 –/– 1.211.873). Diyanüarite ku mart 2026 SOAW a paga Nos Welita Cg 134.652 pa luna na supsidio. Sin ningun aviso adelantá SOAW a keda sin paga Nos Welita supsidio pa aprel 2026. Ora bestür a informá na SOAW dikon nan no a risibí supsidio, SOAW a manda 6 mei 2026 e siguiente e-mail pa Nos Welita ku nos ta publika integral: 

Felis mainta Glenda, 

Refiriendo riba loke Glenda a informá mi ayera, ku Nos Welita a manda un karta pa Minister, aki e kontesta dikon nos NO a hasi pago di Subsidie Aprel 2026 na Nos Welita. 

MB su bedrag ta 1.211.873,00 kual ta 100.989,41 per maand. 

Jan t/m Maart 2026 nos a paga Nos Welita e bedrag di aña pasa kual ta 134.652,58 per maand kual a suma 

un montante di 403.957,74 

1.211.873,00 – 403.957,74 = 807.915,26 

807.915,26 / 100.989,41 = 8 luna (Mei t/m Dec 2026) kual NO ta sobra nada pa paga April 2026. Vandaar Nos Welita no a risibí pago di April 2026. 

---

Saludo kordial / Best regards 

Dept. di Finansas SOAW 

 

E konsekuensia di e desishon di SOAW tabata ku trahadónan di Nos Welita a keda sin 

kobra fin luna. 

Prinsipio di bon gobernashon 

Minister America a kòrta den e supsidio di Nos Welita ku Cg 403.958 sin splika den e dekreto ministerial e motibu di e sanshon. Nos Welita a manda vários karta di opheshon fecha 8 yanüari 2026, 4 i 28 mei 2026, 9 april 2026 i 8 juni 2026. Segun bestür di Nos Welita nan no a risibí kontesta por eskrito di minister America. Prinsipio di bon gobernashon ta eksihí ku un mandatario mester motivá por eskrito su desishon. Desishon di un mandatario mester ta hustu i balansa. Ora un mandatario tuma desishon e tin ku tene debidamente kuenta ku e grupo vulnerabel manera ansiano i enfermera (kende ta mama soltero) ku ta wòrdu perhudiká dor di su desishon. 

Investigashon SOAB 

Den e dekreto ministerial 2026 minister America a pone komo kondishon ku e kantor di accountant SOAB lo kontrolá e bukinan i e servisio ku Nos Welita ta duna na nos grandinan. Den e dekreto ministerial minister ta informá Nos Welita ku e lo reevaluá e montante di supsidio ora ku e rapòrt di SOAB ta kla. Silvania ta aploudí e desishon di minister pa laga SOAB hasi un investigashon. Ora duna sèn di komunidat na un fundashon mester kontrolá ku e sèn ta wòrdu bon gasta. Bestür di Nos Welita a indiká na minister America ku nan ta bai di akuerdo pa laga SOAB hasi e investiga shon. Tambe Nos Welita a informá minister America ku e kuenta anual 2025 ta kla i nan accountant Anthony Cijntje a sertifiká e kuentanan anual. Anthony Cijntje ta deklará por eskrito lo siguiente: 

“Op grond van de door ons verrichte verificatie van de subsidiebestedingen, verklaren wij, dat de aan Fundashon Kas di Ansiano Nos Welita toegekende kader subsidie ad XCG 1.615.836 werd aangewend conform het doel waarvoor deze subsidie werd verstrekt“. 

Pregunta na minister America: 

5. Dikon minister America no a warda resultado di e investigashon di SOAB promé ku kòrta den e supsidio di Nos Welita ku Cg 403.958? Ta ki pura minister America ta’tin pa kòrta den e supsidio? 
6. Dikon minister America a kòrta den e supsidio di Nos Welita sin motivá den e 

dekreto ministerial e motibu di e sanshon? 

7. Dikon minister America a keda sin kontesta por eskrito e bezwaarschrift fecha 8 yanüari 2026 i sobra kartanan di bestür di Nos Welita? Ki dia minister ta bai kontesta Nos Welita por eskrito manera lei ie prinsipionan di bon gobernashon ta eksihí? 

Zakgeld 

Vários bia bestür di Nos Welita a reklamá na SOAW ku nan no ta haña e zakgeld di Cg 75 pa e abitantenan. Segun e bestür SOAW no a ‘stort’ e zakgeld pa aña 2023 i 2024 riba kuenta di banko di Nos Welita. 

8. Dikon SOAW no ta manda e sèn di zakgeld pa Nos Welita por duna e abitantenan? 

Ki dia SOAW ta manda e sèn pa aña 2023 i 2024? 

Silvania ta apresiá si minister sra. Charetty America-Francisca por duna kontesta riba e preguntanan hasí por eskrito den un término rasonabel. 

Konseho pa minister America 

Silvania komo ex mandatario ku a demostrá su kapasidat pa goberná ta konsehá minister America drai bek e redukshon di supsidio. Ora ku e rapòrt di SOAB ta kla minister America ta reevaluá e montante di supsidio. Awor aki ta prematuro pa sanshoná Nos Welita sin ku e resultadonan di investigashon ta riba mesa. Silvania ta spera ku minister America ta pasa man na kurason i evitá ku trahadónan di Nos Welita otro luna atrobe no por kobra nan salario. 

Atentamente, 

Mr.drs. Javier Silvania, Parlamentario pa frakshon di MFK