Ta buska artesanonan pa un trayekto formativo na Farm to Crafts

Willemstad – Farm to Crafts (FtoC) ta lansa un open call pa un Programa di Artesania (Craft Fellowship) ku lo dura seis luna. Artesanonan na Kòrsou ta wòrdu invitá pa manda nan aplikashon. Tin un lugá disponibel ainda den e grupo di sinku partisipante.

FtoC ta buskando un artesano kreativo i motivá ku ta dispuesto pa invertí tempu i dedikashon den investigashon, eksperimentashon i inovashon ku materia lokal, manera fibra di banana i fèrf botániko.

Tur forma di artesania ta bon biní. E programa ta habrí pa hende ku ya tin eksperensia den nan ofishi. Edat no ta un limitashon. Loke ta konta ta kuriosidat, dedikashon i maestria den artesania.

Ehèmpelnan di proyektonan ku por desaroyá den e programa ta inkluí hak ku fibra di banana, pleister ku pigmentonan botániko, mat stul ku fibra natural i traha papel.

Partisipantenan lo haña espasio pa profundisá nan propio práktika i desaroyá aplikashonnan nobo. E programa ta sigui traha riba e komunidat kreativo ku a surgi durante e Maker Days di FtoC. Artesanonan lo bini huntu pa kompartí konosementu, tèst téknikanan nobo i eksplorá posibilidatnan nobo ku materia prima di nos tera.

Durante seis luna, e partisipantenan lo kolaborá ku e tim di FtoC riba investigashon di material, eksperimentashon, interkambio tékniko, reflekshon i e desaroyo di nan propio trabou.

E Programa di Artesania ta kuminsá dia 1 di ougùstùs 2026 i ta dura te fin di yanüari 2027. E kompromiso di tempu ta 16 ora pa luna, ku por wòrdu planifiká fleksibel. E pago ta di akuerdo ku e oranan trahá. Partisipantenan por traha na e sede di FtoC na Hòfi Cas Cora, for di kas òf na nan propio espasio di trabou. Ademas, un reunion plenario lo tuma lugá un bia pa luna. Na final di e programa, e resultadonan lo wòrdu presentá durante un eksposishon òf un dia habrí.

E programa aki ta posibel danki na apoyo di Fundashon Stokroos i ta pone enfoke riba sostenibilidat, herensia kultural i fortifikashon di komunidat.

Inskripshon

Interesadonan por manda nan aplikashon te ku 11 di yüli 2026 via e link den e bio di Farm to Crafts na Instagram. Den e aplikashon bo mester deskribí e ofishi ku bo ta praktiká i e metanan ku bo ke logra ku bo partisipashon. Tambe ta nesesario pa inkluí potrètnan di diferente trabounan representativo.

Un komishon di selekshon, ku ta inkluí diseñador Cleo de Brabander entre otro, lo evaluá tur aplikashon. E resultadonan lo wòrdu komuniká via e-mail no mas tardá ku 20 di yüli 2026.

Tokante Farm to Crafts

FtoC ta konektá artesania, naturalesa i inovashon dor di traha ku materialnan lokal i sostenibel. E inisiativa ta stimulá kompartimentu di konosementu, eksperimentashon i desaroyo di aplikashonnan nobo a base di téknikanan tradishonal. Su meta ta pa kontribuí na fluhonan ekonómiko ku ta fortalesé tantu komunidat komo naturalesa.

https://www.instagram.com/farmtocrafts/