Konsulta Nashonal ta marka inisio di desaroyo di un “Country Cooperation Strategy” Kòrsou 2026– 2031.

Konsulta Nashonal ta marka inisio di desaroyo di un “Country Cooperation Strategy” Kòrsou 2026– 2031.

Willemstad – Ministerio di Salubridat, Medio Ambiente i Naturalesa (GMN), den kolaborashon ku Organisashon Pan-Amerikano di Salú/ Organisashon Mundial di Salú (PAHO/ WHO), a habri awe e Konsulta Nashonal ku Stakeholders pa desaroyá e “Country Cooperation Strategy” (CCS) di Kòrsou pa e periodo 2026– 2031. Gobernadó Su Ekselensia Mauritsz de Kort a hasi e apertura ofisial. Banda di esaki Minister di GMN señor Tyron Boekhoudt i Sekretario General di GMN señor Sharlon Melfor tambe a hiba palabra.

Durante e konsulta di dos dia aki, representantenan di gobièrnu, institushonnan di kuido di salú, organisashonnan sosial, institushonnan di konosementu i investigashon, huntu ku otro partnernan, ta reuní pa determiná huntu e rumbo stratégiko pa loke ta trata puntonan di prioridat di salú di Kòrsou ku lo ser ehekutá den kolaborashon PAHO/ WHO.

E representashon amplio ta mustra ku salú di nos poblashon ta un responsabilidat kompartí. Desishonnan ku ta influensiá salú públiko no ta tuma lugá solamente den sektor di salú, sino ta dependé tambe di enseñansa, medio ambiente, desaroyo i bienestar sosial i kapasidat di nos komunidat pa resistí i rekuperá for di desafionan.

E konsulta aki ta tuma lugá den un momento importante. Meskos ku hopi otro paisnan, Kòrsou ta enfrentá desafionan manera un poblashon ku ta bai bira mas bieu, un demanda di kuido di salú kresiente i gastunan di salú ku ta sigui oumentá. Na mes momentu, e ambishon ta keda meskos: garantisá ku tur hende tin akseso na kuido di kalidat haltu, pero pagabel.

Durante e konsulta lo papia tokante e prioridatnan stratégiko proponé pa e periodo 2026–2031. Esakinan ta enfoká riba:

• fortalesé un sistema di kuido di salú primario integrá, dirigí riba e persona i resistensia na efektonan di kambio klimatológiko, durante tur etapa di bida;
  
• mehorá prevenshon, kontròl i un maneho integrá di malesanan kontagioso i no-kontagioso;
• sigui desaroyá un sistema di salubridat fuerte, sostenibel i efisiente ku ta prepará pa desafionan di futuro.

E prioridatnan aki ta aliniá ku e ambishonnan nashonal di salubridat di Kòrsou, e “Sustainable Development Goals” (SDG’s) i e prinsipio di “Universal Health Coverage”.

E “Country Cooperation Strategy” ta forma e kuadro di maneho pa e kolaborashon aun mas estrecho entre Kòrsou i PAHO/ WHO den e añanan ku ta bini. Durante e konsulta no solamente lo diskutí e prioridatnan stratégiko, pero tambe lo determiná resultadonan konkreto i akshonnan ku lo duna direkshon na e kolaborashon aki.

Ministerio di Salubridat, Medio Ambiente i Naturalesa ta enfatisá ku un sistema di salubridat fuerte no ta solamente un invershon den mihó kuido di salú, pero ta kontribuí tambe na igualdat sosial, desaroyo ekonómiko i e kapasidat di Kòrsou pa resistí i rekuperá for di desafionan.

E ministerio di GMN ta ekspresá su apresio pa e sosten kontinuo di PAHO/ WHO i ta gradisí tur organisashon i profeshonal partisipante pa nan kompromiso i kontribushon profeshonal na e trayekto importante aki.

E resultadonan di e konsulta lo forma e base pa un “Country Cooperation Strategy” 2026–2031 ku tin sosten amplio, ku den dje Kòrsou i PAHO/ WHO lo sigui traha huntu pa un futuro mas salú, mas fuerte i resiliente pa tur habitante di nos isla.

Riba potrèt por mira; Gobernadó Su Ekselensia Mauritsz de Kort, Minister di GMN señor Tyron Boekhoudt, Sekretario General di GMN señor Sharlon Melfor, representante di PAHO/ WHO pa Trinidad & Tobago i Karibe Hulandes señor Gabriel Vivas Francesconi i Konsehero di Programa i Kordinashon pa PAHO/ WHO señora Saadia Lakhdim.