Promé Minister Pisas ta sigui liderá akshon kontra ladronisia i maltrato di bestianan

WILLEMSTAD – Despues di e promé reunion ku kooperativanan agrario ku a tuma lugá 8 di yüli 2026, Promé Minister Gilmar Pisas a presidí un di dos reunion di trabou djaweps 16 di yüli 2026 kaminda tur instansianan ku tin un ròl den e lucha kontra ladronisia i maltrato di bestianan a sinta huntu na mesa.

Na e reunion a partisipá representantenan di Ministerio Públiko, Kuerpo Polisial Kòrsou (KPC), Veterinaire Dienst, Ministerio di Hustisia, Ministerio di GMN, representantenan di e sektor agrario i otro instansianan relevante. E meta prinsipal tabata pa duna klaridat riba e responsabilidat i e ròl di kada institushon den e proseso di prevenshon, investigashon, kontrol i persekushon di e delitonan aki.

Durante e deliberashonnan, kada instansia a splika e trabou ku nan a bin ta hasi, e desafionan ku nan ta enfrentá i e posibilidatnan pa fortalesé e kolaborashon mutuo. Esaki a duna e representantenan di sektor agrario un mihó komprondementu di kon e diferente organisashonnan ta kontribuí den e lucha kontra e problemátika aki.

Ademas, a yega na un serie di palabrashonnan konkreto pa sigui fortalesé e koordinashon entre e partidonan. Entre otro, a disidí pa mantené reunionnan periodiko pa evaluá e progreso i formulá akshonnan ku lo mester duna resultadonan sostenibel riba término largu.

Promé Minister Pisas a enfatisá ku ladronisia i maltrato di bestianan ta un problema ku ta afektá no solamente nos sektor agrario, sino tambe e sentido di seguridat di hopi famia. P’esei, Gobièrnu ta sigui duna e tema aki prioridat, dor di reuní ku tur instansianan relevante den un proseso di kolaborashon struktural ku lo sigui pa término largu, pa formulá i implementá intervenshonnan mas efektivo i duradero pa protehá nos sektor agrario i fortalesé e lucha kontra e tipo di delitonan aki.