Selekshon di Kòrsou Na di 3 Luga di Mundu Durante Representáshon na Mundial di Ekitashon na Repúblika Dominikana Durante e Dianan 15 pa 19 di yüli Ultimo.
Selekshon di Kòrsou Na di 3 Luga di Mundu Durante Representáshon na Mundial di Ekitashon na Repúblika Dominikana Durante e Dianan 15 pa 19 di yüli Ultimo.
Willemstad, Kòrsou – 20 di yüli 2026
Aspafiko su selekshon di 23 atleta a sa di representa Kòrsou dignamente durante di e mundial di ekitashon na Repúblika Dominikana.
Ku hopi entusiasmo Direktiva di Aspafiko ta informá pueblo di Kòrsou ku e selekshon di 23 atleta a sa di representa Kòrsou dignamente durante di e di 15 edishon di “Mundial Confepaso de equitacion en caballos de paso 2026 Felix Santiago Oliver” na Repúblika Dominikana durante e 4 dianan tras di lomba.
Durante e prome dia hobennan femenino di 4 te ku 14 aña a kompeti den diferente kategoria i nos atletanan Kyra Semper i Sophia Schotte a kai den e top 10 miho atletanan den nan kategoria di amazonas juveniles 12-14 aña, pero no a sa di optene premio. Si, nan a duna un bunita presentashon representando Korsou.
Riba e di dos dia a toka turno na hóbennan maskulino di 4 te ku 14 aña i atletanan di nos dushi Kòrsou ku a klasifiká ta Zaenoh Ignacio den e kategoria di 6-8 aña. Greg Offerman (9-11 aña) i Gabriel Magdalena(12-14 aña) tambe a klasifika i Greg Offerman a optene sinta di “tercer puesto” den e kategoria di “ jinetes infantiles de 9-11 aña.
E di tres dia tabata unu yena ku hopi emoshon i orguyo na momentu ku Kynou Bakhuis i Zoe Vlietman a klasifika den e kategoria amazonas juveniles 15-17 aña i ku finalmente Kynou Bakhuis a logra optene e medaya di oro, komo e miho mundialmente den e kategoria amazonas juveniles di 15-17 aña.
Nos damitanan yu di Kòrsou den e kategoria amazonas di 18-20 aña tambe a duna un tremendo presentashon i Anna-Sophia de Jongh a optene e “quinto puesto” i Lyze annah Stewart a optene e “tercer puesto” den e mesun kategoria.
E último dia Kòrsou su bandera a keda alsa dignamente na momentu ku nos atletanan maskulino di 15-17 aña a duna un tremendo presentashon den kua Tristhan Stewart i Leonardo Winkel a sa di klasifika i Leonardo Winkel a optene e “tercer puesto” den e kategoria. Alvinn Cannister a optene e “cuarto puesto” den e kategoria jinetes 18-20 aña. Durante e ultimo kompetensia di jinestes di 25 ana i mas, e atleta Sigfried Sille a duna un tremendo presentashon i a optene medaya di plata den e kategoria.
Finalmente ta sumamente importante pa menshona ku Kòrsou su partisipashon huntu ku 9 otro pais nan manera Merka, Colombia, Venezuela, Ecuador, Puerto Rico, Canada, Aruba, Panama i Repúblika Dominikana, tabata unu tremendo.
E prestashon di nos selekshon i e premionan optene a posishona Kòrsou na e di 3 luga komo pais. Esaki sigur ta un gran logro i orguyo pa e gremio di ekitashon i komo organisashon ku ta representa e deporte aki.
Aspafiko, ku ta un nòmber konosí den e deporte di kabai pa hopi aña, ta stimulá grandi i chikí pa forma parti di e deporte i sera konosí ku e mundu kabayista.
Pa mas informashon: 📞 +5999 6620521 (Alfonso Zinhagel, presidente) ✉️: aspafiko@gmail.com FB: aspafikocuracao
