Promotornan di Salú nobo a gradua: di tres entrenamentu pa Community Health Workers na Kòrsou a finalisá ku éksito
Salubridat Públiko, Medio Ambiente i Naturalesa
Promotornan di Salú nobo a gradua: di tres entrenamentu pa Community Health Workers na Kòrsou a finalisá ku éksito
Publiká riba 20 Yüli 2026
Willemstad, 17 di yüli 2026 – Djabièrnè 17 di yüli 2026, un grupo nobo di “Promotornan di Salú” a risibí nan sertifikado durante e seremonia di graduashon di e di tres entrenamentu pa Curaçao Community Health Workers, ku a tuma lugá na House of Worship na Erosweg. Minister di GMN Sr. Tyron Boekhoudt, tabata presente na e seremonia i a dirigí palabra na e graduadonan.
E entrenamentu intensivo di un siman, ku a kuminsá djaluna 13 di yüli, a wòrdu desaroyá spesialmente pa Community Health Workers na Kòrsou. Un Community Health Worker, òf “Promotor di Salú”, ta un profeshonal di salubridat públiko den promé liña, ku ta funshoná komo un laso di konfiansa entre gruponan vulnerabel den nos komunidat i e sistema di kuido di salú i di servisio sosial.
Den su diskurso, Minister Boekhoudt a gradisí e partisipantenan pa nan dedikashon i kompromiso, i a subrayá ku e Promotornan di Salú ta un adishon nobo i balioso na e sistema di kuido di salú di Kòrsou, un grupo ku gran potenshal i importansia pa salú i bienestar di henter nos poblashon.
Minister Boekhoudt a gradisí tambe tur esnan ku a hasi e di tres entrenamentu aki posibel: Dr. Kenneth Christopher i su tim di Liberty University (Virginia, Merka) pa nan kontribushon i kooperashon kontinuo ku Ministerio di GMN; House of Worship pa nan hospitalidat komo anfitrion; i Iglesia Bida Nobo i Salú pa Tur pa nan liderazgo, kompromiso i partisipashon.
E siguiente pasonan
Ministerio di GMN ta den kombersashon ku Krus Kòra Kòrsou pa integrá e Community Health Workers den nan struktura operashonal. E intenshon ta pa finalisá e kombersashonnan aki pronto, di manera ku e Promotornan di Salú lo tin un struktura operashonal kla i bon definí.
Ademas, Ministerio a aserká resientemente e Direktorado di Maneho di Riesgo i Desaster (DDR), via e Koordinadó Nashonal di ESF6, Sra. Emmylou Jakoba, pa e Promotornan di Salú wòrdu rekonosé i establesé komo partner ofisial bou di e struktura di ESF6. ESF6 ta e divishon di Emergency Support Function ku ta koordiná kuido masal i asistensia di emergensia i humanitario durante desasternan grandi.
Minister Boekhoudt ta felisitá tur Promotor di Salú nobo ku nan graduashon i ta deseá nan hopi éksito den nan trabou pa bienestar di komunidat di Kòrsou.