Futuro di investigashon ekonómiko ta pinta briante 

CBCS ta presentá resultado di Best Economic Research Award 2026 

WILLEMSTAD/PHILIPSBURG – Dia 17 di yüli 2026, Centrale Bank van Curaçao en Sint Maarten  (CBCS) a presentá e premio Best Economic Research Award na e ganadónan di e di seis  edishon. E kompetensia akí a aseptá partisipashon di alumno di Kòrsou i Sint Maarten na nivel  di HAVO, VWO, i bachelor. E aña akí, e ganadónan na nivel di HAVO ta Kavish Punjabi, Justin  Zhuo i Martin Seeman di Learning Unlimited Preparatory School na Sint Maarten. Na nivel di  VWO, Ian Asjes i Emile Hammoud di Radulphus College a bai kas ku e premio, i na nivel di  bachelor, Kristelie Cijntje-Isenia di Inter-Continental University of the Caribbean (ICUC) a bira  e ganadó.  

CBCS ta organisá e kompetensia anual akí ku e meta di stimulá investigashon ekonómiko bou di  studiante, spesialmente relashoná ku ekonomia di Kòrsou i di Sint Maarten. Na tur, CBCS a risibí  19 proyekto bálido, 11 na nivel di HAVO, 5 na nivel di VWO i 3 na nivel di bachelor. E studiantenan  a hasi investigashon tokante diferente asuntu ekonómiko, inkluyendo turismo, merkado di kas,  sistema di pago digital i vulnerabilidat ekonómiko. Ademas, nan a trata vários otro tema ku ta  kontribuí na desaroyo sostenibel di e union monetario 

Un pènel di eksperto ku konosementu amplio riba tereno ekonómiko, fiskal i monetario a evaluá  e obranan presentá. E komité di evaluashon a konsistí di Drs. Alberto Romero, Drs. Eric Matto i Drs.  Miguel de Weever. A evaluá e tésisnan entregá riba metodologia di investigashon, originalidat i  kreatividat, abilidat di skirbi, lay-out i relevansia, teniendo kuenta ku nivel akadémiko di kada  kategoria. 

Kavish Punjabi, Justin Zhuo i Martin Seeman (HAVO) a risibí e Best Economic Research Award pa  nan ‘profielwerkstuk’ titulá ‘Tourism Dependence and Economic Vulnerability in Small Island  States.’ Nan viktoria ta aun mas spesial, pasobra pa promé biaha un skol di Sint Maarten a gana e  Best Economic Research Award. 

Na nivel di VWO, e premio a bai na Ian Asjes i Emile Hammoud di Radulphus College pa nan trabou  di investigashon titulá ‘Betalen in Beweging. Digitale betaalsystemen op Curaçao: kansen en  beperkingen in een kleine markt.’ Na nivel di bachelor, e premio a wòrdu otorgá na Kristelie Cijntje Isenia di ICUC pa su tésis titulá ‘The Impact of Foreign Real Estate Investment on the Housing  Market of Curaçao’. 

Durante e seremonia di entrega ku a tuma lugá na CBCS, e ganadónan a presentá nan proyektonan  di investigashon, pa despues risibí nan trofeo. E ganadónan na nivel di HAVO i VWO a risibí un

premio di Cg 2.500, miéntras ku nan skol a risibí un premio kèsh di Cg 5.000. E ganadó na nivel di  bachelor a risibí un premio di Cg 5.000.  

Pa e ganadónan na nivel di HAVO a organisá un enkuentro spesial na Sint Maarten. Durante e  enkuentro akí, nan a risibí nan premio serka Nicole Marlin, direktor di CBCS na Sint Maarten. 

CBCS ta felisitá tur partisipante ku nan ekselente resultado di investigashon i pa nan aporte balioso  na investigashon ekonómiko. Banko ta deseá nan hopi éksito ku nan estudio i futuro karera  profeshonal. 

Willemstad, 22 di yüli 2026 

CENTRALE BANK VAN CURAÇAO EN SINT MAARTEN