“Huntu nos ta pone e promé piedra pa un futuro mas sigur. Gobièrnu di Kòrsou ta sigui invertí den un Brantwer i Ambulans modèrno i prepará pa sirbi nos komunidat.

[DISKURSO MINISTER HATO]

Awe no ta solamente un seremonia di groundbreaking. Awe ta un momentu ku ta representá un kompromiso. Un kompromiso ku nos hendenan. Un kompromiso ku esnan ku kada dia ta pone nan bida na riesgo pa salba bida di otro.

E pòst aki na Barber a habri su porta na aña 2006, komo un kas di Fundashon Kas Popular ku a ser kombertí i desaroyá despues den un kazèrne pa Brantwer Kòrsou i mas despues ambulans. Tabata tin un temporada ku a start aki na Banda Bou, ku Brantwer tabata drai riba koleganan boluntario i despues e koleganan aki a pasa pa forma parti di e famia di Brantwer. Durante 20 aña no ta semper Brantwer tabata tei 24 ora pa duna servisio aki na Banda Bou, i ta na febrüari 2016 ku a habri e pòst ku personal 24 ora pa asina duna servisio na tur momentu pa habitantenan di Banda Bou den su totalidat. E kazèrne di Brantwer Korsou na Barber aki ta representá un rayòn grandi ku e ta kubri, for di altura di Malpais, te na e último punto na Westpunt.

Pero tempu no ta para ketu.

Despues di binti aña, e edifisio aki ya no ta kumpli ku e eksigensianan di un pòst moderno. E forma di traha a kambia. E ekiponan a kambia. E nesesidatnan di nos personal a kambia. I si nos ke sigui duna e mihó servisio posibel, nos tin e obligashon pa duna nan e mihó kondishonnan pa traha.

Ora mi a asumí e responsabilidat komo Minister di Hustisia, mi a bisa klaramente ku tabatin un servisio ku durante hopi aña no a risibí e atenshon ku e meresé.

Esei tabata Brantwer Kòrsou.

I mi a bisa ku esaki no por sigui asina.

Promesa ta bon. Pero e pueblo ta spera resultado.

I awe nos por bisa ku e resultadonan ta visibel.

Den Gabinete Pisas II i Gabinete Pisas III, nos a hasi invershonnan importante den Brantwer Kòrsou. Nos a invertí den brantspùitnan nobo, tènker nobo i rescuewagen nobo. Nos a invertí den ekipo i materialnan moderno. Nos a invertí den entrenamentu, kursonan lokal i internashonal, pa nos hendenan sigui desaroyá nan konosementu i eksperensia.

I muy pronto, nos lo pone e promé piedra pa un kazèrne sentral nobo pa area di pariba tambe na Montaña Abou.

Ku e remodelashon di e pòst di Barber, i e fasilidat pa Servisio di Ambulans, nos ta invertí den un lugá di trabou mas modèrno, mas sigur i mas efisiente.

Benefisionan pa e komunidat

• Mas lihé na emergensia. Un pòst moderno ku mihó fasilidat ta permití e personal sali mas rápido ora tin kandela, aksidente òf otro situashon di emergensia.
• Mas seguridat pa banda Wèst. Habitantenan di Barber, Soto, Westpunt, Lagun, Fontein, Grote Berg i otro bario den banda Wèst lo sigui konta ku un servisio di emergencia fuerte i prepará.
• Mihó kondishonnan di trabou pa e personal. Bomberonan i personal di ambulans lo traha den un ambiente moderno ku ta kumpli ku e eksigensianan di awe, loke ta kontribuí na un servisio di mihó kalidat.
• Mihó kuido pa e ekipo. E vehíkulonan, materialnan i ekiponan lo por wòrdu wardá i mantené den kondishonnan adekuá, asina ku nan ta kla pa uso na tur momentu.
• Mas efisiensia den operashonnan.

Si nos wak bèk na 2016, na e momentu ku a habri post di Barber, tabatin alrededor di 60 te 90 insidente di emergensia kaminda presensia di Brantwer tabata nesesario. Awor, na 2026, nos ta mira ku esaki a oumentá pa entre 100 te 140 insidente pa aña. Esaki ta indiká ku e komunidat di banda bou meresé un kazèrne di bombero pa garantisá seguridat.

Den e investigashon di dekkingsplan a saka e konklushon ku, na e momentunan aki pòst di Barber ta bon aloká. Ta nesesario, sin embargo, pa den kuater aña hasi un investigashon atrobe, teniendo kuenta ku desaroyonan i rísikonan nobo, pa evaluá si e lokashon I forsa represivo lo sigui sufisiente pa futuro.

Investigashonnan resien ta indiká ku e trabou di bombero ta trese sierto rísikonan pa salú di e personal. Pa e motibu ei, higiena laboral ta un di nos prioridatnan. Nos lo garantisá ku e bomberonan por traha den un manera sigur i minimalisá e posibilidat pa nan drenta den kontakto ku efektonan di huma òf materialnan kímiko ku ta bini liber durante, i despues di un kandela òf otro insidente.

E kazèrne aki lo keda akomodá ku un sistema di tra “schoonwerken”, kaminda lo tin diferente zona pa separá áreanan ku posiblemente kontaminá ku ta kontené restunan di huma òf materialnan kímiko for di áreanan limpi. Esaki lo yuda prevení kontaminashon i protehá salú di e personal.

Nan tur presente aki meresé nos rèspèt tur dia. Aparte di esaki nan meresé tambe nos invershon komo Gobièrnu di Kòrsou.

Lema di awe ta bisa tur kos:

“Huntu nos ta pone e promé piedra pa un futuro mas sigur. Ku e renobashon aki, Gobièrnu di Kòrsou ta sigui invertí den un Brantwer i Ambulans moderno, profeshonal i prepará pa sirbi nos komunidat durante hopi aña mas.”

Mi ke gradisí tur persona i organisashon ku a traha duru pa hasi e proyekto aki bira realidat. Tur partner, tur arkitekto, tur kontratista, tur funshonario i spesialmente nos bomberonan i nos personalnan di ambulans. Mi ke tòg gradisí tambe sr. Dikmar Oleana, ku a hinka su skouder resien bou di e proyekto aki, i ku dia i anochi, a sa di tene reunionnan, sinta ku tur stakeholders na mesa, kana e diferente prosesonan pa awe nos por ranka sali ku e remodelashon aki.

Esaki ta un logro ku nos ta alkansá huntu.

Aki 10 luna (òf ménos Oleana) mi ke tei bèk aki, pa nos dal e promé pasonan den e edifisio nobo ku pueblo di 864 ta bai risibí. MinPres, Banda Bou ta keda orguyoso sigur ku e kazèrne aki.

Huntu komo Gobièrnu di Kòrsou nos ta bai dal e stapnan pa nos ta e pèrla den Karibe.

Biba Brantwer Kòrsou (BIBA!)
Biba Gabinete Pisas III (BIBA!)

Masha danki.