Na memoria di Roy Senchi 

Willemstad, Kòrsou – Ku hopi tristesa, Direktiva di AMAK (Asosiashon di  Músiko i Artista di Kòrsou) a risibí e notisia di fayesimentu di nos kolega i  amigu Roland Antonio “Roy” Senchi. Roy tabata un artista ku a laga un  marka profundo den historia di nos músika i, spesialmente, den e desaroyo  di nos tumba. 

Roy Senchi tabata un di e pilarnan di e tumba moderno. Ku su bos  inkonfundibel, su manera úniko di interpretá i su amor profundo pa nos  kultura, el a inspirá diferente generashonnan di músiko i artista. Ounke ku  nunka el a karga e korona di Rei di Tumba, su talento i su aporte a hasi ku  e pueblo di Kòrsou i mundu musikal a rekonosé komo un “Rei di tumba sin  Korona.” 

Su legado no ta solamente den e tumbanan ku el a kanta, sino tambe den  tur loke ku el a laga atras, manera tur esnan ku e tabatin honor di traha  kuné òf sigui su trayekto artístiko. Nos ta gradisí Roy Senchi pa tur loke el a  nifiká pa nos músika i pa nos identidat kultural. 

Direktiva di AMAK ta ekspresá su mas sinsero palabranan di kondolensia  na Roy Senchi su famia, sernan kerí, amigonan i na henter komunidat  musikal. Nos ta deseá nan hopi forsa den e momentu difísil aki. “Roy Senchi, bo bos por a kaba di kanta, pero bo legado lo sigui resoná pa  semper den kurason di nos pueblo”. 

Roy Senchi ku bo alma sosegá na pas. 

Direktiva di AMAK 

Asosiashon di Músiko i Artista di Kòrsou