Toastmasters ta uni ku Scout Nafasi pa un éksitoso Sip & Paint
Toastmasters ta uni ku Scout Nafasi pa un éksitoso Sip & Paint
WILLEMSTAD – djasabra último Baden Powell Toastmasters Club huntu ku koordinadonan di e proyekto Toastmaster Alice Loos i Zoraida Pisas-Adelaida a organisá un Sip & Paint pa e scoutsnan i lidernan di grupo Scout Nafasi, kaminda nan por a ekpresá nan kreatividat riba canvas.
Grupo Scout Nafasi ta un grupo di scouts ku tin un limitashon pero ku ta aktivo riba e tereno di Scouting. E grupo aki ta reuni tur djasabra na Emmastad sede di Cariben i ta hasi diferente aktividat.
Koordinadonan huntu ku e tim di boluntarionan di Baden Powell Toastmasters Club a organisá un tremendo dia di Sip & Paint pa e grupo kombiná ku aktvidat di moveshon. Durante e Sip & Paint e scoutsnan por a pinta loke nan tabata tin den nan mente pa pone riba e canva. E diferente scoutsnan a hasi uso di pintura pa nan por a ekpresá nan mes, nan tabata artistanan pa e dia aki. Nan a proyektá diferente pinturanan ku ta simbolisá amor, komprenshon pa otro i naturalesa.
Baden Powell Toastmasters Club ta kere den duna bèk na komunidat i a hasi uso di e oportunidat ku e kuríkulo di Toastmasters ta duna pa hasi e proyekto aki. E proyekto aki a sali for di Toastmaster Alice Loos ku a hasi uso dje proyekto “Present a proposal” pa yega na un proposishon, ounke na promé instante el a hasi esaki solamente komo un proposishon na promé instante el a hasi un proposishon pa un proyekto fiktisio kumpliendo ku tur ophetivo den e presentashon. Su presentashon tabata asina real ku al final miembronan tabata asina entusiasmá te a disidi di djòin pa hasi esaki posibel. Di esaki otro a keda inspirá. Toastmaster Zoraida Pisas-Adelaida a hasi uso dje proyekto “Manage your projects successfully” pa ehekutá e proyekto proponé ku a resultá den un evento éksitoso djasabra último. Aki nos por mira kon e kurikulo di Toastmasters ta siña bo prepará, presentá un proposishon i kon pa ehekutá esaki ku éksito.
Na final dje mainta nos a evaluá di un manera kreativo ku e scouts i lidernan i nos por mira bèk riba un día artistiko kaminda nos scouts i lidernan a disfruta di dje.
Si abo tambe ke sa mas kon prepará, presentá, ehekutá i evaluá un proyekto den un ambiente di sosten i kresementu, nos ta invitá bo pa tuma parti na nos siguiente enkuentro día 4 di ougùstùs 2026 di 7-9pm na JCC Kwartier p’asina bo tambe por sa kon Toastmasters por yuda bo ku no solamente presentashon pero tambe kon pa ehekutá proyektonan i asina traha riba bo liderasgo. Pa mas informashon tuma kontakto ku Sra. Laurella Martis na telefòn òf whatsapp +5999 513 7250.
