WoMen’s Steering Committee Curaçao ku eksitoso workshop tokante Embehesimentu
WoMen’s Steering Committee Curaçao ku eksitoso workshop tokante Embehesimentu
WILLEMSTAD – Den kuadro di ‘Dia Internashonal di Penshonado’, WoMen’s Steering Committee Curaçao, djasabra 25 di yüli 2026, a organisá, ku gran éksito, un workshop informativo ku di tema “Embehesimentu di nos Poblashon i su Konsekuenshanan”.
Orador invitá pa e seshon informativo tabata dr. De Lanooi. E evento a konta ku partisipashon hopi interaktivo di esnan presente. Por a nota interes grandi pa e tema. E partisipantenan a sali for di e workshop bon informá, ku mas konosementu i hèrmènt pa traha riba un bida salú, aktivo i deseo pa sigui traha riba un bida di kalidat.
Presidente di WoMen’s Steering Committee Curaçao, sra. Mirieta Lourens-de Lanoy, a habri e mainta ku un spich den kua el a enfoká riba loke nos penshonadonan a nifiká pa nos komunidat. “Awe nos ta onra i rekonosé tur esnan ku durante hopi aña a kontribuí ku dedikashon i kompromiso ku nan famia, nos pais i nos komunidat.
Sra. Lourens-de Lanoy a enfatisá ku embehesimentu ta mas ku yega un edat avansá:
“Kon nos ta kuida nos kurpa, nos mente i nos bienestar emoshonal tin efekto riba embehesimentu. Desishonnan ku nos ta tuma awe riba nos forma di biba lo tin influensia riba embehesimentu.”
E presidente di WoMen’s Steering Commiittee a sera su spich ku un mensahe di inspirashon: “Nos futuro ta dependé di e manera kon nos ta kuida nos mes awe pa nos por disfrutá di e dia di mañan. Un bida mas konsiente di kuido di nos salú, ku ta pone ku nos por ta mas aktivo i felis. Ta si nos kuida awe… nos por disfrutá mañan.”
Despues di e apertura, dr. De Lanooi a duna un presentashon balioso i hopi informative durante kua el a tira lus riba e reto i oportunidatnan di un poblashon ku ta enbehesé. E interkambio ku e partisipantenan a mustra e nesesidat grandi den nos komunidat pa mas informashon i edukashon tokante e tema di embehesimentu.
Women’s Steering Committee Curaçao ta gradisí dr. De Lanooi pa su aporte, i tambe tur e partisipantenan pa nan presensia i interkambio ku e orador. E organisashon ta keda komprometé pa sigui organisá mas charla riba un vatiedat di tópiko di interes. Un pueblo bon informá, ta un pueblo empoderá.
